"Mifankatiava araka ny fifankatiavan'ny mpirahalahy; mitariha lalana amin 'ny fanomezam-boninahitra."- Rem. 12:10
Mofon’aina:
Tsy tokony hifantoka amin'ny tenantsika isika ka hanadino ny adidy andrasan'Andriamanitra sy ny hafa amintsika. (...) Tian'Andriamanitra ho tsara fanahy kokoa isika, ho maha-te ho tia kokoa, tsy ho mpitsikera na fatra-piahiahy ny hafa. Enga anie isika rehetra hanana ny Fanahin'i Kristy, ka hahalala ny fomba hitondrana ny rahalahintsika sy ny mpiara-monina amintsika! (…)
Tsy maintsy manadino ny "izaho" izay manompo ny hafa amim-pitiavana. (...) Mety tsy hotsaroantsika ireo asa tsara sasany nataontsika (...), nefa any amin'ny mandrakizay no hanehoana amin'ny famirapiratany rehetra ny asa tsirairay natao ho famonjem-panahy, ny teny rehetra nampiononana ny zanak'Andriamanitra, ary ireny asa natao ho an'i Kristy ireny no ho isan'ny fifaliantsika mandrakizay.
Rehefa maneho toetra mifanohitra amin'ny hatsaram-panahy sy ny fanajana amin'ny rahalahintsika isika, dia mandeha amin'ny lalana izay tsy nosoritan'i Kristy. Tokony haneho fahalalam-pomba isika ao an-tokantrano, any am-piangonana, ary eo amin'ny fifandraisantsika amin'ny olona rehetra. Ary indrindra indrindra, tokony haneho fangorahana sy fanajana amin'ireo izay manolotra ny fiainany ho an'ny asan'Andriamanitra isika. (...) Hisy fitiavana mamy ao amin'ny fo anjakan'i Jesosy ka ho malemy fanahy sy marina amin'ny namantsika isika. (...)
Aoka tsy hisy hirika hanomezan'ny olona tsiny anao. Ny fahatezerana vetivety, ny valinteny mahery iray monj a, nytsy fisian'ny fahalalam-pomba sy ny fahalemem-panahy kristianina eo amin'ny raharaha madinika dia mety hiteraka fahaverezan'ny namana sy ny hery miasa mangina ananantsika. Tian'Andriamanitra raha miseho amin'ny fisehoana tsara indrindra ianao amin'ny toe-javatra rehetra — na eo anatrehan'ireo izay ambany noho ianao na eo anatrehan'ireo mitovy aminao na izay ambony noho ianao. Tokony ho mpanara-dia an'i Kristy amin'ny fotoana rehetra isika, mikendry ny hanome voninahitra Azy sy ny haneho Azy araka ny tokony ho izy amin'ny lafiny rehetra. (...)
Aoka ho takona ny "izaho", ary aoka i Jesosy no haseho ho maha-te ho tia indrindra. Ny hiaina ho voninahiny no tokony hokatsahintsika fa tsy ny hahazo ny fideran'olombelona.- RH, 24 Febroary 1891.