"Dia tahaka ahy koa manao izay hahafinaritra ny olona rehetra amin'ny zavatra rehetra ka tsy mitady ny mahasoa ahy ihany, fa ny mahasoa ny maro mba hovonjena izy."- 2 Kor. 10:33
Mofon’aina:
Fon'olona maro no itoeran'ny fitiavan-tena izay miraikitra aminy toy ny habokana. (...) Ny eritreriny sy ny drafiny ary ny ezaka ataony dia ho an'ny tenany ihany. (...) Tokony ho tsapany sy horeseny izany fitiavan-tena izany, satria fahotana lehibe eo imason'Andriamanitra. Ilain'ireny fanahy ireny ny haneho fahalianana bebe kokoa amin'ny taranak'olombelona, amin'izany no hampanakaikezany ny fony amin'i Kristy ka ho vonton'ny Fanahiny izy ireo. Hifikitra mafy amin'i Kristy izy ka tsy hisy na inona na inona hahasaraka azy amin'ny Fitiavany.- RH, 13 Jolay 1886.
Ny olona manana fanandramana tsy mahatsiriritra indrindra dia izay manidy ny fangorahany ao am-pony ihany. Ireo izay mandray mba hizara no mahazo ny tsara indrindra eo amin'ny fiainana sy mahatsapa fifaliana tena izy. Mahatsapa fahabangana mandrakariva ireo izay tsy miaina afa-tsy ho an'ny tenany, satria tsy mba mety afa-po. Tsy toetra kristianina ny tsy fanehoana fangorahana sy firaisam-po. Tokony hitondra fahazavana sy fitahiana eo amin'ny fiainan'ny hafa isika. Nifidy antsika Andriamanitra, ho fantsona hampita ny fitahiany amin'ny hafa.-Ms, 99, 1902.
Ho avy ny andro izay hampivembena ny tany ka ho voahetsika tahaka ny trano rantsan-kazo izy. Kanefa ny eritreritry ny mpanompon'Andriamanitra sy ny fikasany ary ny asany, na dia tsy hita ankehitriny aza, dia hiseho amin'ilay andro lehibe fitsarana sy famalian-tsoa. Ireo zavatra hadino ankehitriny dia hijoro ho vavolombelona, na hanamarina na hanameloka.
Tsy very na oviana na oviana ny fitiavana sy ny fahalemem-panahy ary ny fahafoizan-tena. Rehefa hovana hitafy tsy fahafatesana ireo voafidin'Andriamanitra, dia haseho miharihary ny teny sy ny asa tsara nataon'izy ireo, ary hotehirizina mandritra ny mandrakizay. Tsy misy asa fanompoana tsy mitady valiny, na dia kely sy tsotra aza, ho very. Amin'ny alalan'ny fahamarinan'i Kristy izay omena antsika no hitehirizana mandrakizay ny hanitry ny teny sy ny asa toy izany.- RH, 10 Marsa 1904.