"Fa mitomboa amin'ny fahasoavana sy ny fahalalana an'i Jesôsy Kristy, Tompontsika sy Mpamonjy. Ho Azy anie ny voninahitra ankehitriny sy mandrakizay." - 2 Pet. 3:18.
Mofon'Aina:
Ahoana no hahatonga antsika hitombo amin'ny fahasoavana? Tsy ho tanteraka amintsika izany raha tsy foanantsika ao am-pontsika ny izaho, ka atolotsika ny lanitra ny fontsika mba hovolavolaina hanahaka ny an' Andriamanitra. Azontsika atao ny mifandray amin'Ilay loharanon 'ny fahazavana, ny ho velombelomin'ny andon'ny lanitra, ka hirotsahan'ny ranonorana avy any an-danitra. Raha raisintsika ny fitahiana avy amin'Andriamanitra, dia afaka handray fahasoavana amin'ny fatra lehibe kokoa isika.
Toy ny ankizy kely, dia aoka hipetraka eo an-tongotr'i Jesôsy isika, ka hianatra Aminy. (...) Tsy tokony hisy andro iray havelantsika handalo fotsiny, ka tsy hahazoantsika mitombo amin'ny fahalalana ny amin'ny zavatry ny tany sy ny zavatra ara-panahy. (...) Ny fanabeazana ambony indrindra dia avy amin'ny fanazarana ny saina handroso isan'andro. (...) Tokony hihamasaka isan'andro ny fahalalantsika. (...) Raha mibanjina an' i Jesôsy isan'andro isika, fa tsy mijery ny zava-bitantsika, dia handroso tokoa amin'ny fahalalana, na ny amin'ny zavatry ny tany, na ny amin'ny zavatra ara-panahy.
Efa antomotra ny faran'ny zavatra rehetra. Aoka tsy havelantsika hanakana antsika tsy hiasa ny zavatra nataontsika tamin'ny lasa. Hoy Ilay Kapitenin'ny famonjena antsika: "Mandrosoa, fa avy ny alina, ka tsy mahazo miasa ny olona." Aoka isika hitombo amin'ny tsara. Aoka ho eo ambany fahefan'i Kristy mandrakariva ny fiainantsika. Aoka hirehitra sy hazava mandrakariva ny fanilontsika (...). Izay mametraka ny tenany eo amin'ny toerana izay ahafahan'Andriamanitra manazava azy dia handroso; toy ny andro vao mangiran-dratsy izay mihamazava mandra-pibaliaky ny masoandro amin'ny mitataovovonana.
Tsy maintsy ilofosantsika ny fampiasana ny hozatsika rehetra ara-panahy (...) Tsy tian’Andriamanitra hitoetra ho zaza vao hatrany ianao, izay tsy ampy traikefa. Iriny ny hahatraranao ny zana-tohatra avo indrindra, ka hanaovanao dingana miala avy eo ho amin'ny fanjakan'i Jesôsy Kristy Tompo sy Mpamonjy antsika. - OHC, t. 217.