"Fa hahazo hery hianareo amin'ny hilatsahan'ny Fanahy Masina aminareo, ary ho vavolombeloko any Jerosalema sy eran'i Jodia sy Samaria ary hatramin'ny faran'ny tany."- Asa. 1:8.
Mofon'aina:
Vavaka fangatahana ny Fanahy Masina no nataon'ny fiangonana voalohany raha vao niorina izy ireo. Mbola teo amin'ny fahazazany ny fiangonana tamin'izany, ary tsy niaraka tamin'izy ireo mivantana intsony i Kristy. Taloha indrindran'ny niakarany tany an-danitra no nanirahan'i Kristy ny mpianany mba hitory ny filazantsara amin'izao tontolo izao. (...)
Ho fankatoavana ny tenin'ny Tompony, dia niverina tany Jerosalema ireo mpianatra, ary nandritra ny folo andro no nivavahany mba hahatanteraka ny teny fikasan'Andriamanitra. Folo andro nanaovana fandinihan-tena lalina izany. Nanaisotra ny tsy fifanarahana rehetra izay nisy teo amin'izy ireo ny mpianatra, ary niombona tao anatin'ny firaisana kristianina (...) Rehefa tapitra ny folo andro, dia notanterahin'ny Tompo ny teny fikasany tamin'ny alalan'ny firotsahan'ny Fanahiny tamin'ny fomba mahatalanjona. (...)
Inona no vokatr'ilay firotsahan'ny Fanahy tamin'ny andro Pentekosta? Nentina hatrany amin'ny faran'ny tany misy mponina ny vaovao mahafaly momba ny Mpamonjy izay nitsangana tamin'ny maty. Feno fahafoizan-tena lalina sy lehibe ny fon'ny mpianatra, izay nanosika azy ireo handeha hatrany amin'ny faran'ny tany.- RH, 30 Avrily 1908.
Ny fahasoavan' i Kristy no nahatonga ireo apostoly hanao tahaka izany. Ny fanoloran-tena marina ary ny vavaka mafana sy feno fanetren-tena no nahatonga azy ireo hanana firaisana ety amin'i Kristy. (...) Tsapany ny fahalehibeazan'ny trosa tokony haloany amin'i Kristy. Tamin'ny vavaka mafana sy feno faharetana no nahazoany ny Fanahy Masina, ary rehefa izay dia nandeha izy ireo, nitondra tao am-pony ny enta-mavesatry ny famonjem-panahy, sady feno zotom-po hampandroso ny fandresen'ny hazo fijaliana.
Moa ve ny hafanam-pontsika tokony ho latsa-danja amin'ny an'ireo apostoly? Moa ve isika tsy tokony hitaky amin'ny finoana velona ireo teny fikasana, izay nanetsika lalina ny fon'izy ireo ka nahatonga azy hangataka ny Tompo Jesosy mba hanatanteraka ny teniny hoe: "mangataha, dia hahazo hianareo"- Jao. 16:24? Moa ve tsy tokony hirotsaka ankehitriny koa ny Fanahin'Andriamanitra ho valin'ny vavaka mafana sy feno faharetana, ka hameno hery ny olona?- TFC, b. 7, t. 32.