"Fa Hianao, Tompo ô, dia Andriamanitra mamindra fo sy miantra, mahari-po sady be famindram-po sy fahamarinana."- Sal. 86:15.
Mofon'Aina :
Nanome baiko antsika Andriamanitra, araka ny lalan'ny asa fanompoana, ny mba hifampaherezantsika amin'ny halemem-panahy sy fitiavana rehefa mianjady ny fahoriana lehibe. Tsy misy olombelona velona ho an'ny tenany, ary tsy misy maty ho an'ny tenany. (...) Adidy napetrak'Andriamanitra hiantsorohan'ireo mpanompony ny haneho ny toetran'Andriamanitra, ny hijoro ho vavolombelon'ny Fahasoavany sy ny Fahendreny ary ny Fahafoizan-tenany amin'ny fanehoana fitiavana madio sy feno halemem-panahy ary miantra. (...) Nikasika ny fon'i Jesôsy mandrakariva ny fahorian'ny taranak'olombelona; ny fontsika koa dia tokony holefahin'ny Fanahy Masina sy hilefitra Aminy mba hahatonga antsika hanahaka an' i Jesôsy . (...)
Ny anjara asantsika dia ny hamerina indray ny toe-panahin'Andriamanitra eo amin'ny olona amin'ny alalan'ny fahasoavana lehibe atolotr'Andriamanitra antsika amin'ny alalan'i Jesôsy Kristy. Hitantsika eny rehetra eny ny fanahy ambavahaona, koa zava-dehibe indrindra ny hanehoan'i Kristy amintsika ny fangorahany, mba tsy hisy fanahy ho very noho ny tsy fanehoantsika fahari-po sy fahalemem-panahy feno fangorahana. (...) Izao no fanontaniako: moa ve isika hianatra hanana ny fahalemem-panahin'i Kristy indray andro any? Endrey, manao ahoana ny filantsika hahafantatra an'i Jesôsy sy Ilay Raintsika any an-danitra mba hahafahantsika maneho Azy amin'ny toetrantsika! (...)
Miantso antsika hanatona Azy i Jesôsy , tsy ny hamelombelomana antsika amin'ny fahasoavany sy ny fanatrehany mandritra ny ora vitsivitsy fotsiny ka hampandehaniny hiala amin'ny Fahazavany isika avy eo ho ao anatin'ny alahelo sy ny fanjoretana. Tsia, tsy izany, fa ambarany amintsika ny tsy maintsy hitoerantsika ao Aminy ary Izy ao amintsika. Na aiza na aiza anaovana ny asany dia eo Izy (...). Efa nanomana ho ahy sy ho anao fitoerana ao Aminy Izy. Izy no fialofana ho antsika. Tokony hihamitombo sy hihalalina ny fanandramantsika. Efa nasehon'i Jesôsy amin'ny fahafenoany ny fitiavany tsy hay lazaina ka hoy Izy aminao: "mpiara-miasa amin'Andriamanitra" ianareo (1 VV. 3:9). Endrey ny lanjan'izao teny izao! - "Tomoera amiko" Jao. 15:4, "Ento ny ziogako" - Mat. 11:29. Handray izany ve isika? Izao mantsy ny teny fikasana: "dia hahita fitsaharana ho an 'ny fanahinareo hianareo." (...)- TMK, t. 45.