« Ary Samoela zaza nanao fanompoam-pivavahana tamin’i Jehôvah teo anatrehan’i Ely. » 1 Sam. 3:1.
Mofon’aina :
Raha mbola tanora i Samoela, fony izy naterina mba hanao asa fanompoana ao amin’ny fitoerana masina, dia efa nanana andraikitra sahady hotanterahiny amin’ny fanompoana an’Andriamanitra, araka izay fahafahany. (...)
Raha ampianarina ny zanaka mba handray ireo andraikiny isan’andro ho toy ny taranja voatendrin’Andriamanitra ho azy, izany hoe fianarana izay tokony hifotorany mba hahazoany manao fanompoana mahatoky sy mahomby, dia ho hita mahafinaritra kokoa sy be voninahitra lavitra ny asa izay ataony. Ny fanatontosana ny adidy rehetra toy ny ho an’ny Tompo dia mahatonga ny asa ambany indrindra ho feno fahatsarana, ary mampifandray ny mpiasa eto an-tany amin’ireo voary masina izay manao ny sitrapon’Andriamanitra any an-danitra.
Hatramin’ny fahazazany dia fiainam-pahamasinana sy fanoloran-tena ny fiainan’i Samoela. Napetraka teo ambany fiahian’i Ely izy tamin’ny fahatanorany, ary ny toetrany maha-te ho tia dia nambabo ny fon’ilay mpisorona efa antitra. Tsara fanahy izy, nalala-tanana, nazoto, nankatô, ary feno fanajana. Tena niharihary tokoa ny fifanoherana teo amin’ny fitondran-tenan’i Samoela tamin’ny fahatanorany sy ny an’ireo zanaka lahy naterak’ilay mpisorona, ary dia nahatsapa fiadanana sy fahatoniana ary fitahiana i Ely niaraka tamin’ity zaza nankinina taminy ity. Tsy dia nahazatra loatra izany hoe, i Ely, mpitsara lehiben’ny firenena, sy ity zaza tsotra ity, no mpinamana tsy mifankafoy tokoa. Tia manampy sy be fitiavana i Samoela, ary tsy mbola nisy ray tia zanaka mihoatra noho ny fitiavan’i Ely ity tanora ity. Rehefa nihaosa noho ny fahanterana i Ely dia tena nahakivy azy fatratra ny fitondran-tenan’ireto zanany lahy izay sahisahy ratsy sady feno fahadalana ireto, koa dia nitodika tany amin’i Samoela izy mba hahazo fampaherezana sy fanampiana.
Manohina ny fo tokoa ny mahita tanora mifanohana amin’ny efa antitra; ilay tanora miandrandra torohevitra sy fahendrena avy amin’ilay antitra, ary ity farany kosa miankina amin’ilay tanora hahazo fanampiana sy fiaraha-miory. Izany mihitsy no tokony ho izy. Tian’Andriamanitra raha ny tanora no manana toetra tsara toy izany mba hahitany fifaliana amin’ny finamanana amin’ny efa fotsy volo, mba hahatonga azy ireo ho tafaray amin’ny fatoram-pitiavana feno fitsinjovana ireo izay efa toy ny hazo amoron-tevana. – CC, t. 144.