"Kanefa nitodika aho nandinika ny asa rehetra nataon'ny tanako sy ny fisasarana izay nisasarako, ka, indreo, zava-poana sy misambo-drivotra foana izany rehetra izany, fa tsy nisy nahasoa taty" ambanin’ny masoandro." — Mpitt. 2:11.
Mofon’aina:
Nanao fanandramana mampalahelo tamin'ny zavatra tsinontsinona i Sôlômôna, ka niafara tamin'ny fametrahana ny faniriana ambony indrindra tamin'ny zavatry ny tany izany. Tsy nitsahatra nampahatsiaro azy ireo alitaran'andriamanitra sampy fa fitaka ihany
ny fiadanan-tsaina ampanantenain'ireo andriamani-tsy izy ireo. Nampahory azy andro aman'alina tamin'izay ireo fisainana mampalahelo sy manangoly azy. Tsy nisy fifaliana na fiadanan-tsaina ho azy intsony; toa nihamaizina sy nampamoifo azy ny ho avy.
Tsy nanadino azy anefa ny Tompo. Niezaka hampahalala ny mpanjaka ny voka-dratsin'ny fitondran-tena ao amin'ny fahotana tamin'ny fananarana mafy azy izy. Nesoriny taminy ny fiarovany ka navela hamely matetika sy handemy ny fanjakany ny fahavalony. "Ary Jehôvah nanangana fahavalo hanohitra an'i Soloman a, dia Hadada Edomita (...) Ary Andriamanitra nanangana fahavalo koa hanohitra an 'i Solomona dia Rezona (...) kapitenin’ny olona maro izay nankahala ny Isiraely any nanjaka tany Syria. Ary Jeroboama koa, mpanompon'i Solomona,(..) mahay (matanjaka sady be herim-po) dia nanainga tànana hikomy tamin'ny mpanjaka. (1 Mpanj. 11)(...)
Toy ny olona avy nosintonina tao amin'ny nofiny i Solomona tamin'ny fandrenesana izany didim-pitsarana nanameloka azy mbamin'ny taranany izany, ka nirongatra tampoka ny feon'ny fieritreretany ary nanomboka nahatsapa ny fahadalana vitany izy. Rehefa nahatsiaro saina sy torovana vatana amam-panahy izy, dia niala tamin'ny fanangonan-drano mitriatriatran'izao tontolo izao, mba hanala hetaheta indray amin’Ilay loharanon'aina...
Tsy afaka nanantena ny handositra an'ireo vokatra mamohehatra avy amin'ny fahotana izy, na hanafaka ny sainy tamin'ny fahatsiarovana ny fitondran-tena ratsy nataony; nefa niezaka izy mba hitaona ny hafa tsy hanaraka ny fahadalany. Niaiky tamim-panetren-tena ny hadisoany tamin'ny lasa izy, ary nampitandrina ny namany mba tsy ho very tsy azom-panafana noho ny ohatra ratsy nomeny azy ireo.
Izay mibebaka marina dia tsy manadino ny fiainany tamin'ny lasa raha vantany vao mahazo famelana ny fahadisoany. Mahatsiaro ireo notaomin'ny fitondran-tena ratsy nataony tamin'ny faharatsiana izy, ka miezaka amin'ny fomba rehetra azo atao mba hamerina azy ireny indray amin'ny lala-mahitsy. Arakaraka ny famirapiratry ny fahazavana noraisiny no hampahatanjaka ny faniriany hitarika ny namany ao amin'ny lalana marina. — CC, t. 196.