"Koa ny komandy lehibe sy ny solo-mpanjaka dia nitady izay hiampangany an'i Daniela ny amin'ny fanjakana, nefa tsy nahita izay hiampangany azy na izay tsininy akory ireo, satria marina izy, ka tsy nisy kilema na tsiny hita taminy" - Dan. 6:5.
Mofon’aina:
I Daniela, ilay praiminisitra teo amin'ny fanjakana lehibe indrindra teto an-tany, dia mpaminanin'Andriamanitra ihany koa, sady nahazo ny fahazavan'ny tolo-tsaina avy any an-danitra. Olona manana firehetam-po tahaka antsika ihany izy, kanefa mamaritra azy ho olona tsy manan-tsiny ny penina notarihin'ny tsindrimandry. Rehefa nodinihan'ireo fahavalony akaiky ny fitantanany ny raharahany, dia hitany fa tsy nisy hanatsiniana azy izany. Mety ho tonga toa azy koa rehefa mety ho mpandraharaha rehetra rehefa voaova sy voamasina ny fony ary marina eo anatrehan'Andriamanitra ny antony manosika azy. (...)
Tsy azo nohozongozonina tamin'ny fahatokiany tamin'Andriamanitra i Daniela, ary tsy goragora tamin'ny fifehezany tena. Tamin'ny alalan'ny fahamendrehana ambony nananany sy ny fahatokiany tsy azo nohozongozonina, na dia vao zatovo ihany aza izy, no nahitany "fitia sy famindram-po" tamin'ilay tandapa jentilisa nikarakara azy. (...) Vetivety foana dia tonga teo amin'ny toeran'ny praiminisitra teo amin'ny fanjakan'i Babilôna izy. Nandritra ny fotoana rehetra nifandimbiasan'ireo mpanjaka, sy naharavan'ny firenena, ary nitsanganan'ny fanjakana iray vaovao teo amin'izao tontolo izao, dia nampiseho fahendrena fatratra sy fahaizana tsara ny asany teo amin'ny fitondram-panjaka izy (...).
Nomen'ny olona voninahitra i Daniela tamin'ny nampiandraiketana azy ny fanjakana sy ny tsiambaratelon'ireo fanjakana nifehy izao rehetra izao. Nomen'Andriamanitra voninahitra koa izy amin'ny maha-ambasadaorony azy, ka nomeny fanambarana maro momba ny zava-miafin'ireo taona ho avy. Ireo faminaniana mahatalanjona nosoratany ao amin'ny toko faha-7 sy 12 amin'ilay boky mitondra ny anarany, dia tsy nazava tanteraka na dia taminy amin'ny maha-mpaminany azy aza; kanefa mialoha ny nifaranan'ny asany teo amin'ny fiainany dia nomena toky mahafinaritra izy fa "amin'ny andro farany" amin'ny fotoana famaranana ny tantaran'ity izao tontolo izao ity — dia havela hitsangana ho ao amin'ny anjarany indray izy. (...)
Koa dia azo atao ny hivelona toa an'i Daniela sy ny namany ho amin'izay marina sy mendrika ary maharitra. Ary raha mianatra ireo fitsipiky ny fanjakan'ilay Tompo sy Mpamonjy antsika isika eto amin'ity fiainana ity, dia ho voaomana amin'ny fiaviany ka hiditra miaraka Aminy ho ao amin'ny fifaliany. — CC, t. 254.