Amin'ny andro farany, dia hiseho amin'ny fomba manaitra ny fifanandrinana lehibe mahakasika ny fiankohofana. Moa ve isika miankohoka amin'ny Mpamorona, sa miankohoka amin'ny bibidia sy ny sariny?
Ao anatin'ny fotoan-tsarotra ho avy izay mahakasika ny fiankohofana, dia tsy hanaiky ho resin'ny fanerena ataon'izao tontolo izao ireo vahoakan'Andriamanitra mahatoky (Apôk. 14:12). Ny Fanahy Masina no nanisy tombokase azy ireo (Efes. 4:30), ary tsy ho voahozongozona izy. Tamin'ny andro fahiny, ny tombokase dia nanamafy ny fahamarinan'ny antontan-taratasy Ofisialy iray. Marika miavaka sy an'ny tompony manokana izany.
Mampahatsiahy ny Dan. 3 ny fiankohofana amin'ny bibidia sy ny sariny, raha nandray baiko avy tamin'ny mpanjakan'i Babilona i Sadraka sy i Mesaka ary i Abednego ny hiankohofany manoloana ny sary iray vita amin'ny volamena raha tsy izany dia hatsipy ao anatin'ny Iafaoro misy afo mirehitra izy. Babilôna fahiny sy Babilôna moderina — ny fiankohofana no lohahevitra eto. Ny tena fiankohofana marina dia avy amin'ny saina ampianarin'ny Tenin'Andriamanitra, avy amin'ny fanahy voaovan'ny fitiavany sy ny fo feno ny Fanahy.
Tsy miankohoka amin'ny bibidia ny vahoakan'Andriamanitra fa mahita ny fifaliany lehibe indrindra sy ny fahafinaretany ambony indrindra amin'ny fiankohofana Aminy. Avy amin'ny fony feno fitiavana no ipoiran'ny fankatoavany. Manolo-tena ho Azy izy ireo satria fantany ny fanoloran-tena nataon'Andriamanitra taminy.
Vakio ny Apôk. 13:5. Soraty eo amin'ny tsipika eo ambany izany toetra mampiavaka izany.
