Ny faminaniana momba ny mariky ny bibidia ao amin'ny Apôk. 13 dia milaza amintsika ny sehatra mivaivay sy ratsy indrindra misy ny ady ifanaovan'i Satana amin'Andriamanitra. Hatramin'ny nahafatesan'i Jesôsy teo amin'ny hazo fijaliana dia fantatr'ilay fahavalo fa resy izy saingy tapa-kevitra izy ny hisarika olona maro araka izay azo atao hiaraka aminy amin'ny fianjerany. Ny famitahana no paikadiny voalohany amin'izany fitaomana izany. Rehefa tsy mandaitra ny famitahana dia mampiasa hery izy. Izy no ao ambadiky ny didy mampamono na iza na iza manda tsy hiankohoka amin'ny bibidia na tsy handray ny mariny.
Mazava loatra fa tsy zava-baovao ny fanenjehana ara-pivavahana. Efa nisy izany hatramin'ny namonoan'i Kaina an'i Abela noho ny nankatoavany ny baikon'Andriamanitra. Nolazain'i Jesôsy fa hitranga izany na dia eo amin'ny samy mpino aza.
Vakio ny Jao. 16:2; Mat. 10:22; 2 Tim. 3:12 ary ny 1 Pet. 4:12. Inona no niainan’ny fiangonan'ny Testamenta Vaovao ary ahoana no hiharan'izany amin'ny fiangonan'i Kristy amin'ny andro farany?
Fahita matetika teo amin'ny tantaran'ny fivavahana kristianina ny fanenjehana. Niseho izany tao Rôma jentilisa saingy niavaka indrindra tamin'ny fanenjehana mahatsiravina ireo Kristianina mpino ny Baiboly izay nataon'ny Eglizy tamin'ny Vanim-potoana Antenantenany. Ny mariky ny bibidia no masom-by farany amin'io rojon'ny helo io. Tahaka ireo fanenjehana tamin'ny lasa dia natao hanerena ny olona rehetra hanaraka foto-pinoana vitsivitsy sy rafi-pivavahana nahazo fankatoavana manokana izany.
Ambaran'ny faminaniana fa hanomboka amin'ny famaizana ara-ekonômika ny fanenjehana: tsy misy olona afaka mividy na mivarotra raha tsy manana ny marika. Na iza na iza manda tsy handray ny marika dia hiharan'ny didy fampamonoana amin'ny farany (Apôk . 13:15,17)
Ny devoly dia manomana sahady ny fandraisan'ireo mitonona ho Kristianina ny mariky ny bibidia rehefa ho avy ny fizahan-toetra farany izay hampirisihany azy ireo hanao marimaritra iraisana eo amin'ny fiainany. Rehefa hita fa manaraka ny bibidia amim-pitalanjonana ny tany manontolo (Apôk. 13:3) dia miova tampoka ny sehatra ka mifantoka amin'ny olon'Andriamanitra ny faminaniana. Maneho amintsika izany sary izany ny Apôk14:12. "Indro ny faharetan'ny olona masina, dia izay mitandrina ny didin'Andriamanitra sy ny finoana an'i Jesôsy ." Miaina fiainam-pankatoavana feno fitiavana an'Andriamanitra ny vahoakany. Noho ny fahasoavany dia mitoetra tsara izy ireo na dia mihozongozona aza ny manodidina azy rehetra. Manaraka ny bibidia izao tontolo izao fa izy ireo kosa "manaraka ny Zanak'ondry na aiza na aiza no alehany" - Apôk. 14:4. Amin'ny alalan'ny herin'i Kristy no andresen'izy ireo ny herin'ny helo ajoro manoloana azy.
Araka ny efa hitantsika tao amin'ny lesona 9 dia ny fiankohofana no fototry ny fifanandrinana eo amin'ny tsara sy ny ratsy. Mampiasa famitahana ny bibidia ary rehefa mandamoka ireo dia ny herisetra sy ny fanerena indray no ataony.
Hafainganana toy ny ahoana no amelanao ny fiheverana ara-ekonomika hanimba ny fitandremana ny Sabata?