Vakio ny Mar. 10:32-45. Ahoana no anehoan'ireo andininy ireo fa tsy mbola takatry ny mpianatra ihany ny asa nanirahana an'i Jesôsy sy ny atao hoe manara-dia an'i Jesôsy?
Nandroso nanatona an'i Jerosalema ny dian'i Jesôsy, ary nambarany tamin'ny mpianany teny an-dalana izay hitranga rehefa tonga ao. Tantara tsy ninoan'izy ireo izany na niriny horenesina. Nanaitra tokoa ny nilazan'i Jesôsy mazava ny hahafatesany sy ny hitsanganany amin'ny maty, saingy rehefa tsy tiana ny mandre zavatra iray, dia mora tokoa ny manadino azy.
Toy izany indrindra no niseho tamin'i Jakôba sy i Jaona teto raha nanatona mangingina an'i Jesôsy izy ireo nanao fangatahana. Rehefa nofotorin'i Jesôsy tsara izay tena tiany nangatahina, dia namaly ireo hoe: "ny, hipetrahanay ny anankiray ho eo amin'ny ankavananao, ary ny anankiray ho eo amin'ny ankavianao, any amin'ny voninahitrao."Azo tsikeraina mora foana ho fitiavan-tena ny fangatahan'izy ireo. Kanefa efa nanolo-tena hanao ny asan'i Jesôsy izy mirahalahy ireo, koa angamba tsy dia fitiavan-tena tanteraka no nanesika azy ireo hangataka izany.
Niezaka nanokatra ny sain'izy ireo i Jesôsy hahatakatra izay angatahiny. Nanontaniany raha hain'izy ireo ny hisotro amin'ny kapoaka izay sotroiny na ny hatao batisa amin'ny batisa izay anaovana Azy batisa. Ny kapoakany mantsy dia ny fahoriana efa hiaretany ao Getsemane sy eo amin'ny hazo fijaliana (ampitahao amin'ny Mar. 14:36), ary ny batisany dia ny fahafatesany sy ny handevenana Azy (Mar. 15:33-47), izay ahitana tranga mifanindran-dalana amin'izay niseho tamin'ny batisany araka ny voasoratra ao amin'ny Mar. 1.
Kanefa tsy takatr'i Jakôba sy i Jaona izany ka namaly mora foana izy ireo hoe: "Hainay ihany." Dia naminany i Jesôsy fa hisotro amin'ny kapoaka izay sotroiny tokoa izy ireo ary hatao batisa amin'ny batisa izay anaovana Azy batisa. I Jakôba no maty maritiora voalohany tamin'ireo apôstôly (Asa. 12:2). I Jaona kosa no ela velona indrindra tamin'ny apôstôly, ilay natao sesitany tany amin'ny nosy Patmo (Apôk. 1:9), saingy efa nilaza i Jesôsy fa ny amin'ny toeram-boninahitra dia Andriamanitra no mamaritra izany.
Inona ny fihetsiky ny mpianatra teo anatrehan'izany? Tsy dia tsara. Ampiasaina ao amin'ny Mar. 10:41 ilay teny grika hoe aganakteô, nadika hoe "tezitra", izay nampiasaina koa tao amin'ny Mar. 10:14 rehefa tezitra i Jesôsy raha nosakanana tsy hanatona Azy ny zaza.
Dia novorin'i Jesôsy teo Aminy ny mpianany mba hanomezany azy ny lesona mafonja indrindra. Nolazainy fa ny mpanapaka Jentilisa dia mampiasa ny fahefany hahazoan'ny tenany manokana tombony. Fa ao amin'ny fanjakan'Andriamanitra kosa, ny fahefana dia tsy maintsy ampiasaina mandrakariva hanandratana ny hafa sy ho fitahiana ho azy ireny. Nanome ohatra ny amin'izany i Jesôsy amin'ny maha-Mpanjaka Azy ao amin'ny fanjakan'Andriamanitra. Tamin'ny fomba ahoana? Nafoiny ny ainy ho fanavotana antsika. Tsy izany anefa no tena nantenain'ny mpianatra ho re.
Amin'ny maha-Kristianina, inona no atao hoe "manompo" ny hafa? Izany hoe, ahoana no anehoanao io foto-kevitra io eo amin'ny fifandraisanao isan'andro amin'ny manodidina anao?