Hodinihina mandritra ny herinandro: Jao. 8:32; Ezek. 20:12, 20; Apôk. 7:1, 2; Apôk. 14:1; Joe. 2:21-24; Hôs. 6:3; Jak. 5:7, 8; Apôk. 18:1-4.
Tsianjery: "Vidio ny marina, ka aza amidy, dia ny fahendrena sy ny fananarana ary ny fahazavan-tsaina."- Ohab. 23:23.
Andeha atao hoe an-dalam-podiana avy any amin'ny oniversite mba hamonjy ny fotoam-pialan-tsasatry ny fahavaratra ny zanakao vavy mbola tanora, mitondra fiara izy. Raha eo am-piandrasana ny fahatongavany ianao, dia manaraka am-pitebitebena fatratra ny filazana momba ny toetry ny andro. Nampitaintaina anao ny fiovan'ny andro ho ratsy dia ratsy. Raho-mainty mitatao no eny amin'ny faravodilanitra, mitsoka mafy dia mafy ny rivotra. Misokatra ny lanitra ary mivatravatra ny orana. Tsofin'ny rivotra ny hazo ka midaraboka. Tsy ela akory dia manjary tsy azo aleha ilay lalambe mankany an-trano. Kanjo renao tamin'ny mpiara-monina anankiray fa misy lalan-kely iray azo aleha. Azon'ny fiara atao ny miala amin'ireo tapa-kazo latsaka eny amin'ny arabe. Na dia sarotra aza ny fomba ifandraisana dia afaka mandefa hafatra ho an'ilay zanakao vavy ihany ianao, izay milaza aminy an-tsipiriany ny zavatra tokony hataony mba ho tody soa any an-trano izy. Irin'i Jesôsy mihoatra noho ny zavatra hafa rehetra ny hitarika antsika hamakivaky ireo tafiotran'ny fiainana ka hody any amin'ny fonenantsika. Izao no nosoratan'i Ellen G. White: "Misy tafiotra manatona, mifofofofo aoka izany. Moa ve isika efa vonona hisetra izany?"- TFC, b. 8, t. 315.
Ny tanjon'ny fiainan'i Kristy, ny fahafatesany, ny fitsanganany tamin'ny maty, ary ny asa fanompoana ataony ao amin'ny Fitoerana Masina any an-danitra dia ny hahazo antoka fa ho tody soa any an-trano isika. Torolalana avy amin'Andriamanitra izay miantefa manokana amin'ny vahoakan'ny andro farany ny hafa-paminaniana ao amin'ny Daniela sy ny Apôkalipsy, manampy antsika hamakivaky ny tafiotran'ny fiainana izany, mba hahatonga antsika hahazo ny famihinana mamin'ny sandrin'Ilay Mpamonjy be fitiavana indray andro any.
Ny tanjon'ny lesona mandritra ity herinandro ity dia ny haneho ny fanambaran'ny teny faminaniana momba ireo toe-javatra mamarana ny tantaran'ny tany, ary koa ny hahita indray ny herin'i Kristy izay hitondra antsika hamakivaky ny fifanandrinana farany eto an-tany ary hitondra antsika hody.