Hodinihina mandritra ny herinandro: Mar. 7; Isa. 29:13; Eks. 20:12; Mar. 8:11-21.
Tsianjery: "Fa tsy ny zavatra avy eo ivelany izay miditra ao anatin'ny olona no mahaloto azy; fa izay mivoaka avy ao anatin'ny olona no mahaloto azy." - Mar. 7:15.
Ny Mar. 7 sy ireo andininy voalohany amin'ny Mar. 8 no hianarantsika mandritra ity herinandro ity. Manetsika adihevitra i Jesôsy ao amin'ny Mar. 7 noho ny tsy fanarahany ny Iovantsofina sy ny fomba fanao ara-pivavahana. Ny fanaovany izany anefa dia maneho amin'ny fomba manaitra ny fanohanany ireo zavatra manan-danja ho an'ny fiainana kristianina ankehitriny.
Rehefa izay dia nanao ankamantatra Izy, izay manoka- baravarana ho amin'ny fahatakarana marina momba ny finoana.
Taorian'izay no nankanesany tany Tyro sy Sidôna ary nihaonany tamin'ny vehivavy iray izay hany niady hevitra Taminy ao amin'ny filazantsara ka naharesy lahatra Azy. Tsy mahazatra ny fomba nihaonan'i Jesôsy tamin'io vehivavy io; nisy hafatra miafina izay takatr'ilay vehivavy tao anatin'izany fifampiresahana izany, ary noho ny finoany an'i Jesôsy dia nomeny azy izay nangatahiny.
Fahamarinana manan-danja no ambaran'ny Mar. 7 amin'ny alalan'ny trangam-panasitranana iray hafa: na dia mahatalanjona manao ahoana aza ny fahagagana dia tsy ampy hanokatra ny fo handray ny fahamarinana izany matetika. Inona moa no hoentin'ny fahagagana marobe ho an'ireo mpitondra fivavahana izay efa nanapa-kevitra rahateo ny handà an'i Jesôsy?
Dinihin'ny lesona ny hevitry ny mofo amin'ny maha-tandindon'ny fampianarana sy ny fomban-drazana izany, ao amin'ny Mar. 8.
Lesona manan-danja no hita ao amin'ireo tantara ireo, mikasika ny hevitry ny fiainana ara-pivavahana sy ny fombafombam-pivavahana.