Fampidirana
Hodinihina mandritra ny herinandro: Eks. 24:1-18; 1 Kor. 11:23-29; Lev. 10:1,2; Ezek. 36:26-28; Eks. 25:1-9; Eks. 31:1-18.
Tsianjery:
"Dia tonga Mosesy ka nanambara tamin'ny olona ny teny rehetra izay nataon'i Jehôvah sy ny fitsipika rehetra. Ary namaly indray miredona ny olona rehetra ka nanao hoe: Ny teny rehetra izay nolazain'i Jehôvah dia hataonay." - Eks. 24:3
Nirin'Andriamanitra ny hiaraka amin'ny olony sy hitoetra eo amin'izy ireo amin'ny maha-Andriamaniny sy Mpamorona ary ary Mpanavotra Azy. Noforoniny hanana firaisana ety Aminy isika. Mitaky fotoana sy ezaka anefa ny fifandraisana manan-danja amin'ny hafa, tahaka izany koa ny fifandraisana mijidina izay ifandraisantsika amin'Andriamanitra. Mety ho fanandramana mahasoa sy manandratra tokoa izany raha manokana fotoana iarahana Aminy isika. Raha lazaina amin'ny teny tsotra, dia izao no hevitr'izany: fandinihana ny Teniny (Andriamanitra miteny amintsika), vavaka (fanokafana ny fontsika Aminy) ary fijoroana ho vavolombelon'ny fahafatesan'i Kristy sy ny fitsanganany tamin'ny maty ary ny fiverenany (fanaovana ny asa nampanaovin'Andriamanitra). Ho tonga fantsom-pitahiana ho an'ny hafa isika rehefa mitahy antsika Andriamanitra.
Andriamanitra no tokony hifantohana fa tsy ny tenantsika (Heb. 12:1,2). Amin'ny fifandraisantsika Aminy no handraisantsika hery hoenti-manaraka ny Fampianarany, izay midika ho fankatoavana ny Teniny. Tsy mahagaga raha tahaka izao ny fanoritsoritana ny taranaka mpanara-dia an'i Kristy amin'ny andro farany: "mitandrina ny didin'Andriamanitra sy ny finoana an'i Jesôsy ." - Apôk. 14:12.
Tsotra tokoa izany: tia an'Andriamanitra isika, ary noho izany fitiavana izany no ankatoavantsika Azy.
*Famerenana ny lesona ny sabata 06 Septambra.