HERY HOENTI-MANKATÒ
Vakio ny Ezek. 36:26-28. Ahoana no fisehon'ny fankatoavana eo amin'ny fiainantsika?
Intelo ny Isiraelita no nanambara tamin-kafanam-po fa hankato an’Andriamanitra (Eks. 19:8; Eks. 24:3, 7). Zava-manan-danja ny fankatoavana, na dia ampianarin'ny Baiboly aza fa malemy sy tsy tanteraka ary marefo sy mpanota isika olombelona. Tsy teo amin'ny tantaran'ny Isiraely fahiny ihany no nanehoana izany fahamarinana mampalahelo izany fa manerana ny tantaran'ny vahoakan'Andriamanitra rehetra.
Ahoana àry no hahaizantsika manara-dia an'Andriamanitra amim-pahatokiana? Izao no vaovao mahafaly: rehefa mibaiko antsika Andriamanitra, dia manome hery hoentintsika manatanteraka izany. Tsy avy ao anatintsika ny fanampiana fa avy ety ivelany, ary izany no manampy antsika hanao araka ny fitakian'Andriamanitra; Asany izany. Asehon'ny mpaminany Ezekiela mazava tsara izany ao anatin'ny famintinana ara-teolojia ataony ao amin'ny Ezek. 36:26, 27. Andriamanitra irery no mahay manao famindrana fo, esoriny ny fo vatontsika ka soloany fo nofo izay mety andairan'ny fihetsehampo. Araka ny nampahatsiahivin'i Josoa ny mpihaino azy hoe: "Tsy mahay manompo an'i Jehôvah hianareo." - Jos. 24:19.
Azontsika atao ny mandray fanapahan-kevitra hanara-dia an'i Jehôvah , izany no anjara asantsika. Tsy maintsy manao safidy isika, safidy ny hilefitra tanteraka Aminy isan'ora isa-minitra. Tsy ananantsika mantsy na dia ny hery hoenti-manatanteraka ny safidintsika hanompo Azy araka ny nahim-po aza. Rehefa atolotsika an'Andriamanitra kosa ny fahalementsika, dia hampahery antsika Izy. Hoy i Paoly: "fa ny fahalemeko no fahatanjahako." - 2 Kôr. 12:10.
Mariho ny "Izaho" ambaran'Andriamanitra ao amin'ny Ezek. 36:24-30: Andriamanitra no manangona, manadio, manaisotra, manome, manisy ary manetsika ny fonao mba hitandrina tsara ny Lalány. Izay ataony no hataonao. Iray aminao Izy, ary raha miray Aminy ianao, dia hanao araka izay ataony koa. Ho velona ary ho feno hery sy aina ny firaisanao amin'Andriamanitra.
Mbola ny asa izay ataon'Andriamanitra hatrany no ifantohan'izao andalan-tSoratra Masina izao. Hoy ny Baiboly: "Ary ny Fanahiko no hataoko ao anatinareo, ka hahatonga anareo handeha araka ny lalako sy hitandrina ny fitsipiko ka hanaraka azy. Ezek. 36:27. Mandidy ny olona hankato Andriamanitra ary manome azy ireo hery hoenti-mankatò. Ampiany ny vahoakany hanatanteraka ny fitakiany aminy. Fanomezana avy amin'Andriamanitra ny fankatoavana (fa tsy asa tontosa na vitantsika fotsiny), tahaka ny maha-fanomezana avy Aminy koa ny fanamarinana sy ny famonjena (Fil. 2:13).
Raha efa nampanantenaina antsika ny hery hoenti-mankatò, nahoana isika no mbola mora lavo ao anatin'ny fahotana ihany?