NY BOKY SY NY RÀ
Vaklo ny Eks. 24:1-8. Inona no anjara asa tanan'ny famakiana ny Tenin'Andriamanitra sy ny fanatentenana ra teo amin'ny fanamafisana ny fanekena nataon'Andriamanitra tamin'ny vahoakany?
Andriamanitry ny fifandraisana ilay Andriamanitra velona ao amin'ny Baiboly. Tsy zavatra na fandaharanasa no zava-dehibe ho an'ilay Tompontsika fa ny olona. Araka izany dia mifantoka betsaka amin'ny olona Andriamanitra, ary ny hanorina fifandraisana manokana amin'ny taranak'olombelona no tanjona fototry ny Asany. Tsy maintsy mametraka ny fifandraisana ho zava-dehibe rahateo ny Andriamanitra iray izay "fitiavana", satria ahoana no isian'ny fitiavana nefa tsy misy fifandraisana?
Hoy i Jesôsy : "Ary Izaho, raha asandratra hiala amin'ny tany, dia hitaona ny olona rehetra hanatona Ahy." Jao. 12:32. Tsy ny fitsipi-pitondrantenantsika sy ny fampianarana marina na koa ny asa mety atao ihany no mahaliana an'Andriamanitra: ny fifandraisana manokana sy ety amintsika no tena mahaliana Azy ambonin'ny zavatra rehetra. Samy mahakasika ny fifandraisana ireo tsangambaton'ny famoronana (Gen. 1-2): ny voalohany dia mahakasika ny fifandraisana mijidina izay ifandraisantsika amin'Andriamanitra (ny Sabata) ary ny faharoa indray dia mahakasika ny fifandraisana marindrano izay ifandraisan'ny samy olombelona (ny fanambadiana).
Natao hampiorina kokoa ny fifandraisana manokana nirin'Andriamanitra hananana miaraka amin'ny vahoakany ny fanamafisana ny fanekena tao Sinay. Nandritra izany fotoana manokana izany, dia indroa ny vahoaka no niredona fa hankato an'Andriamanitra amin'izay rehetra takiny. "Ny teny rehetra izay nolazain'i Jehôvah dia hataonay" hoy izy ireo. Tena vokatry ny fon'izy ireo tokoa izany, saingy tsy fantany ny tsy fahatanterahany sy ny toetrany marefo sy tsy ampy hery. Natentina teo amin'ny bokin'ny fanekena ny ra, izay nanondro fa amin'ny alalan'ny fahamendrehan'i Kristy irery ihany no hahafahan'ny Isiraely manaraka ny torolalan'Andriamanitra.
Tsy mety manaiky isika fa marefo sy malemy ary mpanota. Fironana ao anatintsika izay nolovaina ny hanao ratsy. Mila fanampiana ivelan'ny tenantsika isika mba hahaizantsika manao ny tsara. Avy any ambony irery no ahazoantsika izany fanampiana izany, avy amin'ny herin'ny fahasoavan'Andriamanitra, avy amin'ny Teniny ary avy amin'ny Fanahy Masina. Na dia eo am-pelatanantsika aza ireo rehetra ireo, dia mbola manatona antsika amin'ny fomba mora foana ny ratsy; sa tsy izany?
Izany no mahatonga ny fifandraisana ety amin'Andriamanitra ho zava-dehibe ho an'ny vahoaka tamin'izany, tao Sinay, tahaka ny maha-zava-dehibe izany ho antsika ankehitriny.
"Ny teny rehetra izay nolazain'i Jehôvah dia hataonay." - Eks. 24:3. Impiry ianao no nanao fanambarana toy izany kanefa tsy nahomby? Inona no hany vahaolana ho an'izany?