Hodinihana mandritry ny herinandro: Kol. 3:18-4:6; Efes. 5:22-25,33; Ohab. 22:6,15; 1 Pet. 2:16; 1 Tes. 5:17.
Tsianjery:
"Aoka ny fiteninareo ho amin'ny fahasoavana mandrakariva, ho mamy sira, mba ho fantatrareo izay tokony havalinareo ny olona rehetra." Kol. 4:6
Miatrika zava-tsarotra samy hafa ny olona rehefa miara-monina sy miara-miasa akaiky. Ny tsy fitovian-kevitra dia mety hiteraka tsy fifankahazoana, eny ady mihitsy aza. Arakaraka ny maha ety ny fifandraisana no maha zava-dehibe ny hifanarahan'ny tsirairay tsara ao anatin'izany fifandraisana izany.
Mazava loatra fa ao anivon'ny tokantrano no ahitana ny fifandraisana ety indrindra. Misy fotoana iantsoana ny tokantrano hoe "orinasan'ny mpianakavy." Fomba iray mahaliana hoenti-manoritsoritra ny fomba fiasan'ny mpianakavy ao an-tokantrano izany. Misy fitoviana tokoa eo amin'ny fomba fitantanana orinasa sy ny fitondrana tokantrano. Tokony hisy ny fifanarahana ankapobeny eo amin'ny soatoavina sy ny tanjona hokendrena. Tokony hifanara-tsaina ny rehetra ary hanao ny anjara asany tsara mba hampizotra ny toe-javatra. Azo ampiharina amin'ny fiangonana koa izany fitsipika izany, amin'ny maha fianakaviana lehibe ny fiangonana.
Manome fitsipika manan-danja tokoa i Paoly ao amin'ny andalan-teny ataontsika tsianjery amin'ity herinandro ity, mahakasika ny fomba tsara indrindra mampirindra ny fiainan'ny ankohonana kristianina, Koa satria tokony hofehezin'ny fitsipika ara-Baiboly ny tokantranon'ireo Romanina tamin'ny andron'i Paoly izany. Manolotra fitsipika tokantrano kristianina, dia tokony ho samy hafa amin'ny sarobidy koa i Paoly, izay hitondra soa ho antsika ao anatin'ny fifandraisana samihafa ifandraisantsika amin'ny hafa, na eo anivon'ny tokantrano izany na any ivelany.
*Famerenana ny lesona ny sabata 21 Martsa.