AFAKA MIFIDY NY HANOMPO
Amin'ny maha-mpitarika marina sy mahatoky an'i Josoa 1 Sam. 15 dia manaja ny safidy malalaka ananan'ny vahoakany izy ary maniry ny hanompoan'ny Isiraely an'i Jehovah araka ny safidim-pon'izy ireo fa tsy amin'ny faneriterena. Izany hevitra izany no tena tiany havohitra raha ninia nampiasa ny matoanteny hoe "nifidy izy (jereo ny Jos. 24:22). Any amin'ny andalan-tSoratra Masina hafa, ny hoe bakhar, "mifidy", dia manondro ny fifidianan' Jehovah ny Isiraely (Deo. 7:6.7, Deo. 10:15: Deo. 14:2). Nanana fahalalahana hanao "tsia" tamin'i Yahweh ny zanak'Isiraely taorian'ny nifidianany azy ireo, kanefa tsy misy heviny sady fahadalana izany. Afaka nanao "eny" tamin Andriamanitra izy ireo ary nitohy ny fiainany, na koa niodina Taminy ka ho fongana.
Inona no navalin'ny Isiraely ny antson'i Josoa? (Jos. 24:16-18). Araka ny hevitrao, inona no anton'ny valintenin'i Josoa manoloana ny teny nataon'ny Isiraely? (Jos. 24:19-21).
Tao anatin'ny valinteny hentitra maneho ny faneken'izy ireo no niaiken'ny Isiraelita fa ilay Andriamanitra notompoin'ireo patriarka sy ny razan'izy ireo koa no "Andriamanitsika" Jos. 24:17,18, izay eken'izy ireo hotompoina amin'ny fanoavana tsy mizarazara. Taorian'izany fanambarana izay tsy azo lavina fa maneho fahatokiana izany, dia mety hihevitra isika fa teny maneho fankasitrahana sy fampirisihana no hataon'i Josoa; tsy Izany anefa no niseho. Toa nahitana fiovana be teo amin'ny resaka nifanaovan'i Josoa sy ny vahoaka; nanjary toa nijoro hanohitra ny fanambaran'ny Isiraely izy ary nanery azy ireo hisaintsaina lalina kokoa. Raha niresaka momba ny fitantanana feno fahasoavana nitondran Andriamanitra azy ireo tamin'ny lasa izy teo aloha, dia nanjary nampitandrina ny Isiraelita tamin'ny fanehoana sarin'ny Andriamanitra anankiray izay tsy mora ny manompo Azy.
Fantatr'i Josoa ny fiovaovan'ireo taranaka voalohany, izay nampanantena fa hankato an'Andriamanitra, tamin'ny alalan'ny fiteny tahaka izany ihany (Eks. 19:8; Eks. 24:3; Deo. 5:24), kanefa nanadino ireo fampanantenana nataony raha vao avy nilaza izany tsy ela akory (Eks. 32). Araka izany, dia nampiasa hailahateny i Josoa mba hahazoany antoka fa takatry ny Isiraelita tsara ireo teboka maro mifandraika amin'ny tenin'izy ireo. Voalohany, ny fanapahan-kevitra ny hanompo an'Andriamanitra dia zavatra feno fahamatorana tokoa, izany no tokony hamaritra ny maha-izy ilay firenena manontolo araka ny fampahafantaran Andriamanitra ny Sitrapony. Mazava ireo fitahiana azo eo am-panatrarana izany tanjona izany nefa tsy maintsy takatra amin'ny fahafenoany koa ireo vokatry ny tsy fankatoavana. Tsy zo raikitra ananan'ny taranak'olombelona tsy akory ny famelan-keloka fa fahagagana vokatry ny fahasoavan Andriamanitra.
Faharoa, ny fanapahan-kevitry ny Isiraelita ny hanompo an'Andriamanitra dia tokony ho araka ny nahim-pon'izy ireo fa tsy vokatry ny faneren'ny mpitarika, eny fa na i Josoa aza izany.
Fahatelo, tokony ho tsapan'ny Isiraely fa tsy hain'ny olombelona ny manompo an'Andriamanitra amin'ny herin'ny tenany. Tsy amin'ny fanarahana ireo zava-takin'ny fanekena no hahatontosan'ny olona ny fanompoana an'Andriamanitra, fa amin'ny alalan'ny fifandraisany a IImanokana amin'ilay Tompo Mpamonjy (ampitahao amin'ny Eks. 20:1,2; Deo. 5:6,7).