Hodinihina mandritra ny herinandro: Jao. 21; Jao. 11:9,10; Jao. 8:42-44; Jao. 4:46-54; 2 Tim. 3:16; Jao. 15:1-11.
Tsianjery:
"Dinihinareo ny Soratra Masina, satria ataonareo fa ao aminy no anananareo fiainana mandrakizay, ary ireny no manambara Ahy." - Jao. 5:39
Fihaonana tany Galilia no mamarana ny filazantsaran'i Jaona, tahaka ny an'i Marka. Miresaka momba io fihaonana io ity lesona farany ao amin'ny filazantsaran'i Jaona ity saingy mampifandray izany amin'ny lohahevitra momba ny fahalalantsika an'i Jesôsy sy ny Tenin'Andriamanitra - lohahevitra izay hita manerana ireo filazantsara efatra izany.
Na dia niaraka tamin'i Jesôsy nandritra ny telo taona mahery aza ireo mpianatra, dia mbola lehibe tokoa ny tsy fahavononan'izy ireo hiatrika ny fanomboana an'i Jesôsy amin'ny hazo fijaliana sy ny fitsanganany amin'ny maty. Efa imbetsaka anefa no nilazan'i Jesôsy tamin'izy ireo ny hitrangan'izany.
Mampalahelo fa tsy mba nino ny Teny nambaran'i Jesôsy izy ireo. Mety tandindomin-doza hanao toy izany koa isika amin'izao andro izao: mandre na koa mamaky ny Tenin'Andriamanitra, saingy tsy mihaino izany, tsy mitoetra ao amin'izany, ary tsy mankató izany. Izany hoe, tsy ekentsika fa izany no fahazavana tokony hitarika ny fisainantsika sy ny asantsika. Indrisy fa izany no toerana misy ny Kristianina maro, na dia mety tsy fantany aza izany.
Ao amin'ity herinandro farany ianarana ny filazantsaran'i Jaona ity no hijerentsika ny sasany amin'ireo teboka manan-danja ao amin'io filazantsara io, izay hanampy antsika hihoatra lavitra ny fahafantarana ivelambelany fotsiny an'i Jesôsy ho amin'ny fahalalana Azy bebe kokoa sy ny fitoerana etiety kokoa ao Aminy sy ao amin'ny Teniny.