Toe-javatra mampalahelo no mameno ny Jao. 11 — ny vaovao ratsy momba ny aretin'ny sakaiza tiana iray (Jao. 11:1-3); ny fitomaniana noho ny nahafatesany (Jao. 11:19,31,33); ny fitarainan'ireo anabaviny ny amin'ny tsy naha-teo an'i Jesôsy satria raha teo Izy dia tsy ho faty toy izao ny anadahiny (Jao. 11:21,32); ary ny nitomanian'i Jesôsy (Jao. 11:35).
Taraiky anefa i Jesôsy. Roa andro taoriana Izy vao niainga ho any amin'i Lazarosy (Jao. 11:6), ary nolazainy aza fa faly Izy noho ny tsy nandehanany aloha (Jao. 11:14,15). Tsy avy amin'ny fangatsiaham-po tsy akory izany fihetsiny izany, fa mba hanehoana ny voninahitr’Andriamanitra.
Efa maty efatra andro i Lazarosy vao tonga ao amin'ny Jao. 11:17-27 isika. Inoana fa efa nisy fofona izany maty hefarana izany, araka ny tenin'i Marta hoe: "Tompoko, maimbo izy izao, fa efa hefarana izay."— Jao. 11:39. Tsy isalasalana fa nanjary nanaitra kokoa aza ilay fahagagana nitranga avy eo, vokatry ny fahataran'i Jesôsy. Natsangany ny maty efa maimbo! Inona indray no porofo hafa tokony homen'i Jesôsy mba hanehoana fa Andriamanitra izy?
Ary amin'ny maha-Andriamanitra Azy, Izay namorona ny aina tany am-piandohana, dia nanana hery handresena ny fahafatesana Izy. Nohararaotin'i Jesôsy io fotoana io, dia ny nahafatesan'i Lazarosy, mba hanambarana fahamarinana iray lehibe momba ny Tenany. "Izaho no fananganana ny maty sy fiainana; izay mino Ahy, na dia maty aza, dia ho velona indray. Ary izay rehetra velona ka mino Ahy dia tsy ho faty mandrakizay." — Jao. 11:25,26.
Vakio ny Jao. 11:38-44. Inona no nataon'i Jesôsy ho fanohanana ny fanambarany?
Tahaka ny nampisehoan'i Jesôsy tamin'ny alalan'ny nampahiratany ilay lehilahy jamba fa Izy no fahazavan'izao tontolo izao (Jao. 9:7), dia natsangany tamin'ny maty i Lazarosy teto mba hanaporofoana fa Izy no fananganana ny maty sy fiainana (Jao. 11:25).
Manondro an'i Jesôsy ho Mpanome fiainana, ho Andriamanitra mihitsy, ity fahagagana ity, mihoatra noho ny fahagagana hafa rehetra. Manohana tsara ny hevitra voizin'i Jaona izany, fa Zanak'Andriamanitra tokoa i Jesôsy ary afaka manana fiainana amin'ny alalany isika, amin'ny alalan'ny finoana (Jao.). 20:30,31).
Any amin'ny faran'ity tantara mahatalanjona ity anefa (Jao. 11:45-54), izay betsaka no nino rehefa nahita izany (Jao. 11:45), dia misy toe-javatra mahatsikaiky sady mampalahelo. Nasehon'i Jesôsy fa mahay manangana amin'ny maty Izy, kanefa izao dia mihevitra ireto olona ireto fa hahasakana Azy amin'ny famonoana Azy ho faty! Ohatra maneho ny fahadalan'ny olombelona tokoa izany eo anatrehan'ny fahendrena sy ny herin'Andriamanitra!