Vakio ny Jao. 1:1-5. Inona no ambaran'ireo teny ireo momba ny Teny, dia i Jesôsy Kristy?
Miantomboka amin'izao hevitra mahatalanjona izao ny filazantsaran'i Jaona: "Tamin'ny voalohany ny Teny, ary ny Teny tao amin'Andriamanitra, ary ny Teny dia Andriamanitra." - Jao. 1:1.
Misy hevitra lalina izay saro-takarina ho antsika ao anatin'io fehezanteny kanto anankiray io.
Voalohany, ny tantaran’ny Famoronana no tondroin'ilay mpanoratra ny Filazantsara, ny Gen. 1:1, "Tamin'ny voalohany”. Efa teo ilay Teny talohan'ny niandohan'izao rehetra izao. Araka izany, dia ambaran'i Jaona ny fisian'i Jesôsy hatramin'ny mandrakizay.
Manaraka izany, "ary ny Teny tao amin'Andriamanitra". Ambaran'i Jaona fa "ao an-tratran'ny Ray" Izy, ao amin'ny Jao. 1:18. Na toy ny ahoana ny fiezahantsika haka sary an-tsaina ny tena hevitr'izany, dia izao no azo antoka: manana firaisana ety dia ety i Jesôsy sy ny Ray.
Rehefa izay, dia hoy i Jaona: "ary ny Teny dia Andriamanitra". Ahoana no mahatonga ny Teny sady tao amin'Andriamanitra no Andriamanitra? Ao amin'ny dikanteny grika no ahitana ny valin'izany. Manana mpanoritra voafaritra ny teny grika ("le" amin'ny teny frantsay), saingy tsy manana mpanoritra tsy voafaritra ("un/une" amin'ny teny frantsay) kosa. Ny zava-manan-danja ho antsika, araka izany, dia ny fanondroan'ny mpanoritra voafaritra grika ny zavatra na olona iray manokana.
Misy mpanoritra voafaritra ao amin'ny teny hoe "ny Teny tao amin'Andriamanitra"; ny teny hoe "Andriamanitra" no soritany, izay manondro Persôna iray manokana, ny Ray. Ary ny Teny tao amin'ny Ray. Ao amin'ny fehezanteny hoe "ary ny Teny dia Andriamanitra" kosa, ny teny hoe Andriamanitra dia tsy manana mpanoritra; manondro ny toetran'Andriamanitra izany. Andriamanitra i Jesôsy — saingy tsy Ray Izy, na izany aza dia Zanakalahin'Andriamanitra Izy, ilay Persôna faharoa ao amin'Andriamanitra telo izay iray.
Manamarina izany fahatakarana izany ilay Apostôly , satria ambaran'ny Jao. 1:3,4 fa i Jesôsy no Mpamorona ny zavatra rehetra. Ny zavatra rehetra izay tsy nisy teo aloha dia nanjary nisy tamin'ny alalan'i Jesôsy, ilay Andriamanitra Mpamorona.
"Hatramin'ny andro fahagola dia efa iray tamin'ny Ray Jesôsy Kristy Tompo; `Endrik’ Andriamanitra Izy' tamin’izany, endriky ny fahalehibeazany sy ny fiandrianany, famirapiratan’ny voninahiny.'" - IFM, t. 7.
Nahoana ny maha-Andriamanitra feno an'i Kristy no anisan'ny teolojiantsika izay manan-danja tokoa? lnona no ho verintsika raha toa i Jesôsy ka voary fotsiny ihany? Ento ao amin'ny kilasy amin'ny Sabata ny valinteninao, ary miomana hifanakalo hevitra mikasika ny antony mahazava-dehibe ho an'ny finoantsika ny maha-Andriamanitra mandrakizay an'i Kristy.