NY FANEKENA ALOHA
Vakio ny Jos. 5:1-7. Nahoana Jehôvah no nandidy an'i Josoa mba hamora ny taranaka faharoa tamin'ny Isiraelita tamin'io fotoana manakana teo amin'ny ady ho fakana ny tany Kanana io?
Taorian'ny fisafoana ilay tany sy ny tatitra mampahery nentin' ireo mpisafo tany ary ny fiampitana an'i Jordana tamin'ny fomba mahagaga, dia fifanandrinana mivantana amin'ny fahavalo no mety andrasantsika. Kanefa misy zava-manan-danja kokoa noho ny ady ataon'ny tafika: ny fanekena ataon'ny Isiraely amin'Andriamanitra.
Mialoha ny hirosoan'ilay taranaka vaovao haka ny tany, dia nilain'izy ireo ny hahatakatra amin'ny fahafenoany ny fifandraisany manokana amin'ilay Tompon'ny tany. Ny fanavaozana ny famantarana ny fanekena no valin'ny fahasoavan' Andriamanitra sy ny fahagagana nataony tamin'ny nitondrany ny Isiraely niampita an'i Jordana sy ny nahatafitan'izy ireo izany.
Ny fanekena ataontsika amin'Andriamanitra dia tokony ho valinteny feno fankasitrahana mandrakariva noho izay efa nataony ho antsika, fa tsy fikendrena hahazo tombontsoa amin'ny alalan'ny fanarahana ny fitakiany sy ny fitsipiny. (Tsy isalasalana fa nanan-danja tokoa izany hevitra izany tao anatin'ny fifandiran'i Paoly tamin'ireo nisisika ny hamorana ny Jentilisa niova fo, araka izay hita mazava ao amin'ny epistiliny ho an'ny Galatianina).
Efa hiditra eo amin'ny ady ara-tafika lehibe indrindra teo amin'ny tantarany izao ny Isiraely ka mety hihevitra isika fa somebiseby amin'ny fanomanana ny ady ny toby iray manontolo. Niomana tokoa izy ireo, saingy tsy araka izay fanaon'ny rehetra izany. Tsy namehy ny soavaly tamin'ny kalesiny izy na koa nandranitra ny sabany, fa nanao fombafomba izay nahatonga ny ankamaroan'ny tafika harefo tao anatin'ny telo andro farafahakeliny.
Nanao izany izy ireo mba hankalazany ny fifandraisany tamin'ilay Andriamaniny izay nanafaka azy avy tany Egypta. Nahoana? Satria fantany fa an'i Jehovah ny ady; Izy no manome azy ireo fandresena sy fahombiazana. Nanambara izany foto-kevitra izany tamin'ny fomba somary hafa kokoa i Jesôsy : "Fa katsaho aloha ny fanjakany sy ny fahamarinany, dia hanampy ho anareo izany rehetra izany." - Mat. 6:33. Saika amin'ny fotoana rehetra no toa aneren'ny fiainana andavanandro antsika hanenjika ireo zava-manan-danja maro tokony hatao, hany ka manjary hadinontsika ny manome lanja ny zava-dehibe indrindra eo amin'ny fiainantsika: ny fanavaozana isan'andro ny fanolorantsika tena ho an'i Kristy.
Eritrereto ireo fotoana maro nanaovanao tsirambina ny fotoana iarahana amin'Andriamanitra noho ny amin'ny zavatra izay "manan-danja" kokoa. Nahoana no mora tokoa ny manao izany, ary ahoana no hiadiantsika amin'izany? Isan'andro ny fanolorantsika tena ho an'i Kristy.
Eritrereto ireo fotoana maro nanaovanao tsirambina ny fotoana iarahana amin'Andriamanitra noho ny amin'ny zavatra izay "manan-danja" kokoa. Nahoana no mora tokoa ny manao izany, ary ahoana no hiadiantsika amin'izany?