Vakio ny PM, toko 1: "Ny niavian'ny ratsy".
"Noho ny fahendrena lalina ananan’Andriamanitra dia noroahiny niala tany an-danitra i Losifera fa tsy naringany. Fankatoavana vokatry ny fitiavana ihany no tadiaviny. Ny fahatokiana dia tiany ho vokatry ny fahitana ny hatsaram-panahiny sy ny fahamarinany. Raha avy hatrany dia nolevonin’Andriamanitra i Satana raha vao nanota, dia tsy ho takatr'ireo mponina any an-danitra ny momba ny fahamarinan'Andriamanitra, satria tsy fantatr'izy ireo ny tena toetran'ny ota sy ny vokatra aterany. Raha nofongorana avy hatrany tsy ho isan'ny velona ilay anjely mpikomy, dia ho maro tamin'ireo mponina any an-danitra no nanompo an’Andriamanitra tamin-tahotra fotsiny fa tsy tamim-pitiavana. Tsy ho fongana tanteraka ny hery nananan'ilay mpamitaka; ny toe-tsaina mpikomy nananany dia mbola tsy ho levona. Mba hisian'ny soa ho an'izao tontolo izao mandritra ny taonjato tsy manam- petra mifandimby, dia navela hanatanteraka an-tsakany sy an-davany ny foto-keviny ilay ratsy. Fa amin'izany no hahitan'ny zavaboary manontolo ny tena toetran'ny famelezany ny fanjakan'ny lanitra, ka hiseho miharihary amin'izay ny toetran'Andriamanitra feno fahamarinana sy famindrampo ary ny tsy fiovan'ny didin'i Jehôvah dia tsy hananam- pisalasalana mihitsy intsony na oviana na oviana.
"Ny fiodinan'i Satana dia tokony hahitan'izao tontolo izao lesona mandritra ny taona maro mifandimby, ka ho vavolombelona mandrakizay manambara ny toetran'ny fahotana sy ny vokany mahatsiravina. Tian'Andriamanitra hoenti-maneho ny fiafaran'ny fandavana ny fahefany ny vokatry ny teti-dratsy nampiasain'i Satana tamin'ny olona sy ny anjely. Sitrany ny hampiharihary fa ny fahasambarana ho an'ny zavaboariny rehetra izay noforonin'ny heriny, dia miankina amin'ny fisian'ny fanjakany. Koa dia fiarovana mandrakizay ho an'ny olo-masina tsy ho voan'ny famitahan'ny ota sy ny voka-dratsy aterany ny nisian'ilay tantara mahatsiravina." - PM, tt. 16,17.
FANONTANIANA hifanakalozan-kevitra
1. Ny teny hoe "Théodicée" dia entina manamarina an'Andriamanitra eo anatrehan'ny ratsy. Tsy manamarina ny ratsy velively anefa izany. Alao sary an- tsaina hoe misy olona iray any an-danitra milaza hoe: "Oh, eny tokoa ry Jesôsy ô, fantatro amin'izay ankehitriny ny anton'ny nampijaliana sy namonoana ny ankohonako teo imasoko. Misaotra Jesôsy ô!" Tsy mitombina izany. Ahoana no hahatonga antsika hahatakatra fa Andriamanitra no hohamarinina amin'ny fiafaran'ilay fifanandrinana lehibe, fa tsy ny ratsy? (jereo ny lesona 9)
2. Efa nahatsapa toa an'i Joba ve ianao? Efa nalaim-panahy ve ianao hieritreritra fa tsy mety hisy fanazavana mahafa-po momba ny fijaliana niainanao na ny havan-tianao? Niaiky i Jôba nony farany hoe: "(...) nilaza izay tsy fantatro aho (...)" - Joba 42:3; ahoana no itondran'izany fanazavana ho antsika mikasika ireo toe-javatra mampanontany tena antsika?