Na dia tsy takatsika aza ny fomba sy ny fisainan'Andriamanitra, ny Soratra Masina dia manambara hevitra sasantsasany izay manampy amin'ny famahana ny olan'ny faharatsiana. Fomba iray azo anazavana izany olana izany ilay antsoina hoe safidy malalaka.
Araka izany, ny faharatsiana dia vokatry ny fampiasana amin'ny fomba ratsy ny safidy malalaka nomena ny voary. Koa tsy tokony homen-tsiny ny amin'ny ratsy Andriamanitra, satria ny ratsy dia vokatry ny fanararaotan'ny zavaboary ny safidy malalaka nomen'Andriamanitra azy, izay azony nampiasaina ho amin'ny tsara. Nahoana anefa Andriamanitra no nanome safidy malalaka toy izany? Izao no nosoratan'i C. S. Lewis momba izany: "ny safidy malalaka, na dia mahatonga ny ratsy ho azo atao aza, dia izy koa no hany mahatonga ny fitiavana na ny hatsarana na ny fifaliana eo amin'ny fiainantsika ho manan-danja. Ny tontolo tsy misaina - ny zavaboary miasa toy ny milina dia tsy mendrika ny hoforonina. Fahasambarana avy amin'ny firaisana Aminy sy ny fifankatiavana amin'ny hafa koa, an-kalalahana sy an-tsitrapo, no fahasambarana kendren'Andriamanitra ho an'ny zavaboariny manana ny maha-izy azy. (...) Tsy maintsy manana safidy malalaka izy ireo mba hahatanteraka izany." - Mere Christianity (New York: MacMillan, 1960), t. 52.
Vakio ny Gen. 2:16,17. Ahoana no anehoan'ireo andininy ireo ny fananan'i Adama sy i Eva fahafaha-misafidy?
Nahoana Andriamanitra no mandidy azy ireo raha tsy nanana safidy malalaka hatrany am-boalohany izy ireo? Nihinana ilay voankazo voarara i Adama sy i Eva, ary nanomboka teo dia feno faharatsiana ny planetantsika. Miseho ao amin'ny Gen. 4, toko manaraka aorian'ny fitantarana ny Fahalavoana, ny vokatry ny fahotana tamin'ny namonoan'ny rahalahiny an'i Abela. Ny fitantarana ny Fahalavoana dia mampiseho fa nahatonga ny fahotana sy ny faharatsiana ho tafiditra ao amin'ny tantaran'ny tanintsika ny nampiasan'i Adama sy i Eva ny safidy malalaka nananany tamin'ny fomba ratsy.
Hitantsika manerana ny Soratra Masina ny maha-zava-misy ny safidy malalaka. (Jereo ny Deo. 7:12,13; Jos. 24:14, 15; Sal. 81:11-14; ary ny Isa. 66:4.) Na isika aza dia mampiasa isan'andro io fahafaha-misafidy nomen'ny Mpamorona antsika io eo amin'ny fiainana, amin'ny lafiny isan-karazany. Raha tsy misy ny safidy malalaka, dia tsy ho olombelona akory isika. Ho toy ny milina isika, na "robot" tsy misy saina.
Namorona alika "robot" ny "Sony Corporation", antsoina hoe "Aibo". Toy ny alika tena izy mihitsy izy io, manaikitra, saingy tsy mety marary, tsy misy parasy, tsy tsy mila atao vakisiny, ary tsy mihitsam-bolo. Hatakalonao an'i Aibo ve ny alikanao manana nofo aman-drà? Raha tsy izany, ahoana no mety hanampian'ny safidinao anao hahatakatra bebe kokoa ny antony namoronan'Andriamanitra antsika tahaka ny nataony, dia olona manana safidy malalaka - na dia eo aza ny loza mety aterak'izany?