Vakio ny Sal. 90, Sal. 102:11, sy ny Sal. 103:14-16. Inona no tena olan'ny olombelona?
Tsy inona fa zavona ihany ny fiainan'ny olombelona raha miolotra amin'ny mandrakizay. "Tahaka ny fotoam-piambenana iray amin'ny alina" - Sal. 90:4, izay maharitra adiny telo na adiny efatra ny arivo taona eo imason'Andriamanitra. Mihelina sy manidina ny androm-piainan'ny zanak'olombelona raha oharina amin'ny andron'Andriamanitra (Sal. 90:10). Ny mahery indrindra amin'ny olombelona dia toy ny zava-maniry marefo indrindra (Sal. 90:5,6; Sal. 103:15,16). Kanefa feno asa manasatra sy alahelo ny fiainana na fohy toy izany aza (Sal. 90:10). Eny, na ny olon'izao tontolo izao izay tsy manam-pinoana an'Andriamanitra aza dia ory sy mitaraina noho ny hafohin'ny fiainana, indrindra manoloana ny mandrakizay izay fantany fa toa tsy ho hitany velively.
Ny Sal. 90 dia mampiseho fa miahy ny vahoakany Andriamanitra amin'ny maha- Mpahary Azy, na eo aza ny toerana sarotra misy azy ireo. Efa fonenan'ny olony hatramin'ny taranaka rehetra ny Tompo (Sal. 90:1,2). Ny teny hebreo ma'on, izay nadika hoe: "fonenana" dia maneho ny Tompo ho toy ny fialofana sy fiarovana ho an'ny olony (Sal. 91:9).
Fehezin'Andriamanitra ny fahatezerany na dia ara-drariny aza, ary arotsany indray ny fahasoavany. "Iza no mahafantatra ny herin'ny fahatezeranao sy ny fahaviniranao araka izay tokony ho fahatahorana Anao?" - Sal. 90:11, hoy ny mpanao Salamo. Midika izany fa tsy mbola nisy olona nanandrana tamin'ny fahafenoany ny fikapoky ny fahatezeran'Andriamanitra noho ny fahotana; koa misy fanantenana ho an'ny olona mba hahatongavany amin'ny fibebahana sy hahazoany fahendrena hoentiny miaina amim-pahamarinana.
Tsy fahalalana ara-tsaina fotsiny no amaritan'ny Baiboly ny atao hoe fahendrena fa fanomezana haja an'Andriamanitra koa. Ny fahaizana "manisa ny androntsika" no fahendrena ilaintsika (Sal. 90:12). Raha azontsika isaina ny androntsika dia midika izany fa voafetra ilay izy, ary fantatsika ny maha-voafetra azy. Ny miaina amim-pahendrena dia midika ho fahatsapana fa fohy tokoa ny fiainana, ary mitarika ho amin'ny finoana sy fankatoavana izany. Raha tsy amin'ny alalan'ny fibebahana (Sal. 90:8,12), ny famelan- keloka sy ny fiantran'Andriamanitra ary ny famindrampony (Sal. 90:13,14), dia tsy misy azo atao hahazoana fahendrena.
Ny tena olantsika dia tsy isika nohariana ho olombelona fa ny fahotana sy ny vokany manimba izao tontolo izao sy ny olona rehetra.
Soa ihany fa misy vahaolana nentin'i Jesôsy ho antsika (Jao. 1:29; Jao. 3:14-21), raha tsy izany dia tsy misy azontsika antenaina velively.
Na mihelina toy inona aza ny fiainantsika, inona ny toky ananantsika ao. amin'i Jesôsy? (Jereo ny Jao. 3:16.) Misy fanantenana hafa ho antsika ve ankoatra Azy?