Hodinihina mandritra ny herinandro: Mar. 14; Jao. 12:4-6; Rôm. 8:28; Eks. 24:8; Jer. 31:31-34; Zak. 13:7.
Tsianjery: "Ary hoy lzy: Aba, Raiko ô, ny zavatra rehetra hainao; esory amiko ity kapoaka ity; nefa aoka tsy ny sitrapoko anie no hatao, fa ny Anao." — Mar. 14:36.
Mitantara ny fahorian'i Jesôsy tamin'ny nahafatesany hatramin'ny nitsanganany tamin'ny maty ny Mar. 14 hatramin'ny Mar. 16. Araka ny hitantsika ao amin'ny lesona 9 dia tranga niseho tao anatin'ny herinandro eo ho eo no tantaraina ao amin'ireo toko enina farany ao amin'ny bokin'i Marka. Ny ankamaroan'ireo zava-nitranga voalaza ao amin'ny Mar. 14--16 dia niseho tamin'ny andro Alakamisy sy Zoma tao anatin'izany herinandrom-pahoriana izany. Andro Zoma i Jesôsy no maty, ary andro Alahady no nitsanganany tamin'ny maty.
Mifantoka amin'ny Mar. 14 ny lesontsika amin'ity herinandro ity, manomboka amin'ilay "Sandwich Story" (tantara mifanosona) fahadimy, izay ahitana fihetsika roa mifanohitra manoloana an'i Jesôsy. Arahin'ilay fiaraha-misakafo hariva farany izany, ary avy eo, ny tolona natrehin'i Jesôsy tao Getsemane. Teo no nisamborana Azy teo anatrehan'ireo mpitondra fivavahana mba hotsaraina.
Mifandray amin'ny fandavan'i Petera an'i Jesôsy ny tantaran'ny fitsarana an'i Jesôsy, ary io no "Sandwich Story" (tantara mifanosona) fahenina farany ao amin'ny bokin'i Marka. Mbola fihetsika roa mifanohitra hatrany no hita eto, saingy manondro fahamarinana iray ihany. Misy toe-javatra roa mifanohitra hita mifanindran-dalana mandritra ilay fitantarana manontolo. Aseho mazava ao amin'ny Marka fa mifanipaka izy ireo, sady ambarany ny fandresen'i Jesôsy.