Vakio ny Mar. 13:19. Inona no tondroin'ireo andalan-teny ireo?
Ny Mar. 13:14 izay miresaka momba ny fahavetavetan'ny fandravana no Iohahevi-dehibe ifantohan'io toko io (jereo ny fizarana Talata). Manamarika fiampitana ho amina Iohahevitra hafa koa ny Mar. 13:19. Manondro ny fahorian-dehibe izay tsy misy toy azy hatramin'ny namoronana an'izao tontolo izao izany. Fanenjehana lehibe lavitra sy miitatra kokoa noho izay nitranga tamin'ny faharavan'i Jerosalema no ambaran'izany. Miova ho amin'ny filazam-potoana ho avy ny mpanoratra ao amin'ny Mar. 13:19, izay manondro toe-javatra lavidavitra kokoa avy eo amin'ny andron'i Jesôsy.
Tahaka ny Mar. 13:14 izay mamerina ny faminaniana ao amin'ny Dan. 9, ny fanenjehana lehibe ao amin'ny Mar. 13:19-23 eto koa dia mamerina ireo faminaniana ao amin'ny Dan. 7 sy 8 izay anenjehan'ilay tandroka kely ny vahoakan'Andriamanitra "ambara-pahatapitry ny fetr'andro iray sy ny fetr'andro roa ary ny antsasaky ny fetr'andro." - Dan. 7:25. Mitovy amin'ny 1260 taona ara-bakiteny io fe-potoana ara-paminaniana 1260 andro io (Nom. 14:34; Ezek. 4:6). Teo anelanelan'ny taona 538 TrK sy ny taona 1798 TrK izany. Naniraka ny mpitari-tafiny mba hisambotra ny papa i Napoléon tamin'ny taona 1798 TrK. Nandritra io fe-potoana 1260 taona io no nanenjehan'ilay tandroka kely sy namonoany ireo izay tsy niombon-kevitra tamin'ny rafi-pitondran'ny fiangonany.
Vakio ny Mar. 13:20-23. Inona ny fanantenana omen'Andriamanitra ny vahoakany mandritra ny fotoam-panenjehana, ary inona ny fampitandremana omeny azy ireo rehefa mifarana izany?
Ambaran'ny Mar. 13:20 fa nohafohezina ny fotoam-panenjehana noho ny amin'ireo vahoakan'Andriamanitra. Araka ny tantara, nihalefy ny afon'ny fanenjehana taorian'ny Refôrmasiona prôtestanta; nanafohy ny fotoam-pahoriana izany. Nihena ny herin'ilay tandroka kely ary maro ny olona niandany tamin'ny fanavaozana ara-pivavahana. Hiverina indray anefa ny herin'ilay tandroka kely, araka izay ambaran'ny Apôk. 13.
Mampitandrina ny amin'ny loza mitatao hafa i Jesôsy ao amin'ny Mar. 13:21-23, tsy inona izany fa ny mpaminany sandoka sy ny kristy sandoka izay hiseho mialoha ny hiverenany. Nilaza tamin'ireo mpanara-dia Azy lzy mba hiambina fandrao ho azon'ireny. Tsy mbola nanomboka tsy akory ny fihetsehana mitondra ny anaran'i Jesôsy tamin'ny fotoana nampitandremany mikasika ny kristy sandoka, kanefa nanao fanambarana nampitolagaga izay tanteraka tokoa lzy (na amin'izao andro izao aza dia misy mitonona ho Jesôsy).
Ahoana no tokony hampitomboan'izany fanambarana mialoha ny hoavy izany ny fitokiantsika amin'ny Tenin'Andriamanitra?