Vakio ny Sal. 141. Inona no antom-bavaky ny mpanao Salamo eto?
Vavaka fangatahana fiarovana amin'ny fakam-panahy avy ao anatiny sy avy any ivelany ny Sal. 141. Tsy vitan'ny tandindomin-doza ho voafandriky ny ratsy fanahy fotsiny ny mpanao Salamo (Sal. 141:9,10) fa alaim-panahy hanao tahaka ny ratsy fanahy koa. Ny lafiny voalohany mampalemy ny mpanao Salamo dia ny vavany, ary mivavaka izy mba hambenan'ny Tompo ny varavaran'ny molony (Sal. 141:3). Ny fiambenana ny vavahadin'ny tanana, tamin'ny andron'ny Baiboly, izay fiarovana ilay tanana, no aseho amin'io sary an'ohatra io.
Ary izao koa no fakam-panahy: hanaraka ny torohevitry ny marina ve ny zanak'Andriamanitra sa hanaiky ho voafitaky ny fandroboan'ny mpanao ratsy (Sal. 141:4,5)? Ny fony no hitan'ilay mpanao Salamo fa tena ahiana, satria eo no tena sehatry ny ady. Vavaka tsy mitsahatra omban-toky tanteraka sy fanoloran- tena amin'Andriamanitra no hany mahavonjy ny zanak'Andriamanitra amin'ny fakam-panahy (Sal. 141:2).
Vakio ny Sal. 1:1 sy ny Sal. 141:4. Ahoana no anoritsoritana ny toetry ny fakam-panahy izay misoko miadana sy feno hafetsena eto?
Manoritsoritra ny toetry ny fakam-panahy izay mandroso miandalana ny Sal. 141:4. Voalohany, mirona ho amin'ny ratsy ny fo. Faharoa, mahavanona asa ratsy izany (ny hevitry ny teny hebreo niavian'ilay dikan-teny dia maneho fiverimberenan'ilay asa). Fahatelo, mihinana ny zava-pin'ny ratsy fanahy ny fo, izany hoe manaiky ireo fomba ratsiny ho zavatra maha-te ho tia.
Toy izany koa ao amin'ny Sal. 1:1. Sakanan'ny fakam-panahy tsy hizotra eo amin'ny lalan'ny Tompo ny zanak'Andriamanitra amin'ny fitaomany azy handeha eo amin'ny fisainan'ny ratsy fanahy, hijanona eo amin'ny làlana falehan'ny mpanota, ary hipetraka eo amin'ny fipetrahan'ny mpaniratsira. Tsy azontsika atao ny ho tahaka ireo olon-dratsy ireo na hamela azy ireo hampanalavitra antsika amin'ny Tompo.
Ny fiafaran'ny ratsy fanahy sy ny olo-marina dia tokony hampianatra ny olona hitady fahendrena avy amin'Andriamanitra (Sal. 1:4-6; Sal. 141:8-10). Kanefa ao amin'ny Salamo, ny fanamarinana farany ny zanak'Andriamanitra dia mbola amin'ny hoavy. Midika izany fa antsoina hatoky an'Andriamanitra sy hiandry Azy amim-paharetana ny mpino.