Vakio ny Mar. 10:17-31. Inona ireo lesona lehibe momba ny finoana sy ny sandan'ny maha-mpianatra hita eto, ho an'ny olona rehetra na manankarena na mahantra?
Ny fomba nanatonan'ilay Iehilahy an'i Jesôsy dia naneho ny fahatsorany sy ny fanajany an'i Jesôsy. Nihazakazaka izy, nandohalika teo anatrehany, ary nametraka fanontaniana mavesa-danja momba ny anjaran'ny fanahy tsirairay avy - Inona no hataoko handovako fiainana mandrakizay? Ny tapany faharoa amin'ny Didy folo no namalian'i Jesôsy azy. Dia nasehon'ilay Iehilahy indray ny faniriany hanao ny tsara ka nilaza izy fa efa notandremany avokoa ireo rehetra ireo hatry ny fony kely.
Ny bokin'i Marka irery, amin'ireo filazantsara efatra, no manamarika fa tian'i Jesôsy ilay Iehilahy. Mahafinaritra ny finiavan'ilay Iehilahy hanao ny tsara. Kanefa nozahan'i Jesôsy toetra ny fahatokiany tamin'ny nilazany taminy mba hivarotra ny fananany rehetra ka hanaraka Azy. Tsy tena nitandrina ny didin'Andriamanitra ilay Iehilahy raha ny marina. Nandika ny didy voalohany izy satria nisy zavatra nomeny toerana ambony kokoa noho Andriamanitra teo amin'ny fiainany. Nataony sampy ny harenany.
Avy eo dia nohazavain'i Jesôsy fa mamandrika tokoa ny harena ary moramora kokoa ny hidiran'ny biby lehibe toy ny rameva amin'ny vodi-fanjaitra kely noho ny hidiran'ny manan-karena any an-danitra.
Dia gaga ny mpianatra, nametra-panontaniana hoe: iza indray izany no ho azo vonjena? Izao no navalin'i Jesôsy ao amin'ny Mar. 10:27: "Raha amin'ny olona dia zavatra tsy hainy izany; fa tsy mba tahaka izany amin'Andriamanitra; fa ny zavatra rehetra dia hain'Andriamanitra."
Toa tsara tokoa raha mifarana eo amin'ny Mar. 10:27 ny tantara: tsy efan'ny tenanao samirery ny miditra ny lanitra; mila ny fahasoavan'Andriamanitra ianao mba ho voavonjy.
Kanefa notohizan'i Petera izany tamin'ny nilazany fa izy sy ny namany dia efa nahafoy ny zavatra rehetra ka nanaraka an'i Jesôsy. Dia namaly i Jesôsy fa izay rehetra afointsika noho ny fanarahana Azy dia tsinontsinona raha mitaha amin'izay horaisintsika, amin'izao andro izao sy amin'ny "andro ho avy".
Izao raha fintinina: Ny fahafatesan'i Kristy no namaha ny olan'ny fahamelohan'ny olombelona, ary ny fahasoavan'i Kristy sy ny fitsanganany tamin'ny maty no manome hery ny olona ho afaka hitandrina ny didiny.
Vakio ny Rôm. 6:1-11. Ahoana no anehoan'ireo andininy ireo ny fahasoavan'Andriamanitra eo amin'ny fiainantsika, izay sady manamarina antsika no manova antsika ho olom-baovao ao Aminy?