Vakio ny Mar. 7:24-30. Inona ny lesona manan-danja hita ao amin'io tantara io?
Taorian'ny andalan-teny saro-takarina tao amin'ny lesona omaly, dia miteraka fanontaniana saro-baliana koa ny tantara ao amin'ireto andalan-teny ireto. Nahoana i Jesôsy no nanao valinteny henjana tamin'ilay vehivavy ka niantso azy hoe amboakely mihitsy aza?
Tsy hazavainy mivantana izany, kanefa maneho ny lesona tiany hampitaina ny valinteniny izay toa ahitana lafin-javatra roa. Ambarany ao amin'ny Mar. 7:27 fa ny zaza "aloha" no tokony ho voky. Raha misy ny "aloha" dia azo heverina ny hisian'ny "izay vao..." aorian'izany. Ny lafiny faharoa dia ny fampiasan'i Jesôsy endri-panalefahana ao amin'ny teny hoe amboa, izay tsy midika ho zanak'alika, fa ireo alika izay avela handeha ao an-trano tsy tahaka ireo mpirenireny eny amin'ny arabe. Naverin'ilay vehivavy ireo teboka roa ireo, izay nanazava ny valinteniny, raha namaly an'i Jesôsy izy.
Somary nivantambantana ny valintenin-dravehivavy. Hoy izy: "Eny, Tompoko, kanefa na dia ny amboakely ao ambanin'ny latabatra aza dia mba mihinana ny sombintsombin'ny mofon-jaza ihany." - Mar. 7:28.
Ahoana no nahatonga io vehivavy io hanao izany valinteny izany tamin'i Jesôsy? Azo antoka fa ny fitiavany ny zanany vavy no nanosika azy tamin'izany kanefa nandrisika azy koa ny tenin'i Jesôsy. Ny teniny hoe "aloha" dia naneho fa hisy ny aorian'izany. Ankoatra izany, nambarany fa amboakely ao ambany latabatra ravehivavy. Tahaka ny amboa ao an-trano izay ao ambany latabatra no nankanesany teo an-tongotr'i Jesôsy mba hitalaho ho an’ny zanany vavy. Notakiny tamin'izany ny zon'ny amboakely amin'ny hanina izay latsaka eo amin'ny tany.
Maneho ny finoan'ilay vehivavy ny valinteniny. Ny fiantsoany ny fahagagan'ny fanasitranana avy eny lavitra izay atao amin'ny zanany vavy hoe "sombintsombin'ny mofo" dia maneho fa lehibe tokoa ny herin'i Jesôsy (raha sombi-mofo ny fahagagana toy izany, dia ho toy ny ahoana moa ny mofo?), maneho koa izany fa ny famalian'i Jesôsy ny fangatahany dia zavatra kely foana ho Azy. Nanetsika ny fon'i Jesôsy izany ka novaliany ny fangatahan-dravehivavy.
"Tamin'ny fifandraisany taminy, dia nasehony fa izay noheveriny ho lavin'ny fiaraha-monina tsy ho ao lsiraely dia tsy vahiny intsony, fa zanaka ao amin'ny ankohonan'Andriamanitra. Amin'ny maha-zanaka azy dia tombontsoany ny mandray anjara amin'ny fanomezan'ny Ray." - IFM, t. 428.
Nahoana ny fitsaratsarana mikasika ny fihodirana sy ny fiaviana no mifanohitra amin'ny fampianaran'i Jesôsy? Ahoana no hahafahantsika miala amin'izany faharatsiana izany?