Vakio ny Mar. 8:11-13. Inona ny fihetsik'ireo Fariseo izay nandiso fanantenana fatratra an'i Jesôsy?
Nahoana moa raha toa asehon'i Jesôsy ny hery maha-Andriamanitra Azy ary noreseny lahatra ireo mpanindrontsindrona ireo? Miverina any amin'ny faran'ny Mar. 3 ny olana, izay iresahan'i Jesôsy mikasika ny fahotana atao amin'ny Fanahy Masina. Raha tsy mety mihaino ny sofin'ny olona iray ary mikipy ny masony, dia tsy haharesy lahatra azy mihitsy ny fahagagana hafa, eny fa na dia ny famantarana avy any an-danitra aza. Holaviny fotsiny tahaka izay rehetra efa natao teo aloha izany. Na ny fahagagana aza dia tsy ampy handresen-dahatra ireo izay efa tapa-kevitra ny tsy hino.
Vakio ny Mar. 8:14-21. Inona ny zavatra hadinon'ny mpianatra, ary inona ny hevitra nasongadin'i Jesôsy avy amin'izany?
Nohararaotin'i Jesôsy izany fotoana izany mba hampitandremana ny mpianatra tsy ho azon'ny "masirasiran’ny Fariseo sy ny masirasiran'i Herôda (Mar. 8:15), izany hoe ny fampianaran'izy ireo (ampitahao amin'ny Mat. 16:12).
Tsy takatry ny mpianatra anefa izany ka nihevitra izy ireo fa niresaka momba ny tsy hividianana mofo ara-bakiteny i Jesôsy. Manome torolalana ireo mpianatra ireo i Jesôsy isaky ny tsy mahatakatra araka ny tokony ho izy ny resaka ataony izy ireo. Nametraka fanontaniana marobe tamin'izy ireo ny Tompo; natao hampieritreritra ny ankamaroan'izany fanontaniana izany, izay nampiseho ny fahadisoam-panantenany noho ny tsy fahatakaran'izy ireo ny iraka nampanaovina Azy. Mampahatsiahy izay nolazainy tao amin'ny Mar. 4:10-12 ny zavatra nambarany, mikasika ireo any ivelany izay tsy mahatakatra ny Teniny. Natao hanairana ireo mpianatra hifoha amin'ny torimasom-panahiny ny teny mahery nataony.
Mametraka fanontaniana tsotra Izy ao amin'ny Mar. 8:19,20, momba ny isan'ny harona nasiana ny sombi-mofo tsy lany raha namahana olona dimy arivo sy olona efatra arivo Izy (Mar. 6:30-44; Mar. 8:1-10). Napetrany ireo fanontaniana ireo mba hanehoana fa tokony ho takatr'ireo mpianatra amin'izay fa tsy sakana ho an'ny Mesia ny tsy fahampian'ny fitaovana eo an-tanana. Mbola fampieritreretana koa ny fanontaniana farany napetrany ao amin'ny Mar. 8:21: "Mbola tsy mahafantatra ihany va hianareo?" Firifiry rahateo moa ny zavatra efa hitan'izy ireo sy niainany niaraka tamin'i Jesôsy!
Ahoana no hianarantsika hanokatra ny saina sy ny fontsika handray ny fahamarinan'Andriamanitra sy ny Fitiavany? Saintsaino ireo porofo rehetra efa nomena antsika momba Azy sy ny Fitiavany. Nahoana anefa isika no mora misalasala indraindray?