"Ary mihoatra noho ny zavatra rehetra, mifankatiava tsara: fa ny fitiavana manarona fahotana maro." - 1 Pet. 4:8.
Mofon’aina:
Nanontany ny amin'izay tokony hataony mba handovany ny fiainana mandrakizay ilay tovolahy nanatona an'i Jesôsy. Nilaza taminy i Jesôsy ny mba hitandremany ny didy ka nitanisa maromaro tamin'izany. Hoy ilay tovolahy: "Izany rehetra izany efa voatandriko avokoa; fa inona no tsy mbola mahatanteraka ahy?" - Mat. 19:20. Mampahafantatra ny olona ny adidy amin'ny fitiavana an'Andriamanitra ireo didy efatra voalohany, ary ny enina farany kosa dia maneho fitakiana ny hitiavana ny namana tahaka ny tenantsika. Firy amintsika moa no tena manao izany amim-pahamarinana tokoa sy amin'ny fo manontolo?
Ho avy tsy ho ela ny Tompo, moa ve isika manao ireo adidy araka ny fahamarinana? Ny fitiavana no fototry ny toetra araka an'Andriamanitra. Tsy misy manana fitiavana an' Andriamanitra, na toy ny ahoana ny fitompoan-teniny momba izany, raha tsy manana fitiavana ny rahalahiny izy ka tsy mihevitra izay azy. Tahaka ny itiavantsika an'Andriamanitra noho Izy efa tia antsika taloha no hitiavantsika ireo rehetra nanoloran'i Kristy ny ainy. Tsy havelantsika tsy handre ny fampitandremana na tsy hiasana na koa tsy hokarakaraina ny fanahy izay tandindomin-doza lehibe sy mita fanampiana. Tsy havelantsika (...) ho tavela irery ao anatin'ny fahoriana sy ny fahakiviana izy ireny ka ho latsaka ao anatin'ny faritanin'i Satana, satria hataon'Andriamanitra amintsika izay ataontsika amin'ireo rahalahintsika na ireo madinika indrindra ao amin'ny ankohonan'Andriamanitra.
Kolokoloy ny fahamoram-panahy; aoka ny rivotry ny fitiavana no hitsoka manodidina anareo ao an-tokantrano. (...) Izay rehetra manameloka sy mampalahelo na manakivy ny hafa, izay tsy mahay maneho hatsaram-panahy sy firaisam-po ary fangorahana an'ireo alaim-panahy sy iharan'ny fizahan-toetra, dia hampandalovina amin'ny fanandramana izay nolalovan'ny hafa sy niaretany. Ho tsapany amin'izany ny fahoriana niaretan'ny hafa noho ny tsy nanehoana firaisam-po taminy, mandra-pialan'ny hamafin'ny fony sy hanokafany ny fony hidiran'i Jesôsy.
Tsy maintsy mandray ny herin' Andriamanitra izay manova fo ny fanahy rehetra manana fifandraisana amin'ny asa sy ny raharahan'Andriamanitra, mba ho fenon'ny fitiavan'i Kristy sy ny fangorahany ny tsirairay, raha tsy izany dia tsy mba hahita ny fanjakan'ny lanitra izy ireo. - TDG, t. 239.