"Koa ny anankiray nomeny talenta dimy, ny anankiray roa, ary ny anankiray iray - samy araka izay fahaizany avy." - Mat. 25:15.
Mofon’aina:
Halalino ny torolalan'ny Mat. 25:14-46. Ampitahao amin'ny tantaram-piainanao izany. Aoka hamela ny fizahozahoany ny olona rehetra. (...) Andeha isika hanaraka ny dian-tongotr'i Kristy ao amin'ny fanetren-tenan'ny finoana marina. Andeha havela ny fitokiana amin'ny tena ka hanolo-tena isan'andro sy isan'ora amin'ny Mpamonjy isika, dia handray fahasoavana hatrany sy hizara izany. Mitalaho amin'ireo mitonona ho mpino an'i Kristy aho mba handeha amim-panetren-tena eo anatrehan'Andriamanitra. Fahavetavetana ho Azy ny avonavona sy ny fanandratan-tena. Hoy i Kristy: "Raha misy olona ta-hanaraka Ahy, aoka izy handa ny tenany sy hitondra ny hazo fijaliany ka hanaraka Ahy." - Mat. 16:24. Ireo izay mankato izany teny izany ihany no ekeny ho mpino. "Fa izay rehetra nandray Azy dia nomeny hery ho tonga zanak'Andriamanitra, dia izay mino ny anarany, dia ireo izay tsy nateraky ny rà, na ny sitrapon'ny nofo, na ny sitrapon'ny olona, fa naterak 'Andriamanitra." - Jao. 1:12,13.
"Ary ny Teny dia tonga nofo ka nonina tamintsika" - and. 14. (...) Niala teo amin'ny toerana ambony nisy Azy ilay Andrianan'ny lanitra; (...) napetrany ny fitafiana sy ny satroboninahitra maha-Mpanjaka Azy, ka nosaronany ny maha-olona ny maha-Andriamanitra, mba hahatongavany ho Mpampianatra (...) ny sarangan' olona rehetra sy hiainany fiainana tsy misy fitiavan-tena na fahotana (...), ka hanehoany ohatra izay azon'izy ireo tahafina amin'ny alalan'ny fahasoavany.
"Ary ny Teny dia tonga nofo ka nonina tamintsika; ary hitanay ny voninahiny, dia voninahitra miendrika ho an'ny Lahitokana avy tamin'ny Ray" - and. 14. Derao Andriamanitra noho izany fanambarana mahatalanjona izany! Toy ny lehibe loatra ka tsy ho takatsika ny fahamarinana asehon'izany (...). Deraiko Andriamanitra noho ny fahitako ny Mpamonjy amin'ny alalan'ny finoana. (...) Ny hany fanantenana ho antsika amin'izao fiainana izao dia ny fanatsorantsika ny tanan'ny finoana ka hamikirantsika ilay sandry izay mitsotra mba hanavotra. (...) Raha manala ny fijerintsika amin'ny tena mba hijery an'i Jesôsy isika, ka hanao Azy ho mpitarika antsika, dia ho hitan'izao tontolo izao eo amin'ny fiangonantsika ny hery izay tsy hitany ankehitriny. - TDG, t. 373.