"Mba ho iray ihany izy rehetra, tahaka Anao Ray ato amiko, ary Izaho koa ao Aminao, mba ho ao amintsika koa izy; mba hinoan 'izao tontolo izao fa Hianao no naniraka Ahy." - Jao. 17:21.
Mofon’aina:
Samy mila ny hevitry ny hafa avokoa isika rehetra. Fisainana hafa noho ny antsika no hiasan'Andriamanitra. Miara-miasa ireo fanomezam-pahasoavana samy hafa nomena ny tsirairay "ho fanatanterahana ny olona masina, ho amin'ny asan'ny fanompoana amin'ny fiangonana, ho amin'ny fampandrosoana ny tenan 'i Kristy." — Efes. 4:12.
Hanasitrana ny aretintsika mbamin'ny fahalementsika ny Tompo Jesôsy Kristy. Azy isika, amin'ny alalan'ny famoronana sy ny fanavotana. Aoka ho iray ihany ao Aminy isika rehetra. Izy no hany loharanon'ny fahasitranana. (...) Nanokatra loharano ho an'ny mponin'i Jerosalema hanafaka fahotana sy fahalotoana Izy (Zak. 13:1). Manasa ny tsirairay Izy hanatona mba hositranina, ary mba hisotro amin'ny ranon'aina. Aoka tsy hatoky ny tenantsika isika fa hatoky an'i Jesôsy.
Hisy sakana mandrakariva eo anoloantsika, kanefa aoka isika hanaraka Ilay mpitarika antsika ka hifampitantana hiatrika ny zava-tsarotra ao anatin'ny firaisan-kina. Tokana ihany ny lalana mankany an-danitra. Tsy maintsy manaraka ny dian'i Jesôsy isika, manao ny asany, dia tahaka Azy nanao ny asan'ny Rainy. Aoka hodinihantsika ny fombany fa tsy ny fomban'olombelona; aoka hankatoavintsika ny sitrapony fa tsy ny antsika. Mitandrema tsara andrao mandeha alohan'i Kristy. Aza manao na inona na inona raha tsy mila saina amin'ny Mpitarika anao. Manaova vavaka tsotra, dia "hahazo hianareo". Izy no lalana sy fiainana ary fahamarinana.
Vakio sy diniho tsara ny vavaka nataon'i Kristy mialoha ny nitsarana Azy, ao amin'ny Jao. 17. Araho ny fampianarany dia ho tonga amin'ny firaisana ianareo. Ny hany fanantenantsika hahazoana ny lanitra dia ny maha-iray antsika amin'i Kristy, ary avy eo dia ho iray ihany isika rehetra ao amin'i Kristy sy amin'ny alalany. Tsy misy olona nantsoina handeha irery. (...) Miantso ho amin'ny firaisana i Kristy, aoka hisy eo anivontsika izany. Mangataka antsika Andriamanitra mba ho voafina ao amin'i Kristy ny "izaho". Tsy mora amin'ny olombelona manana fironana ara-nofo izany. Kanefa hiseho ao amin'ny fahalemem-panahy sy ny fahatsarany ny herin'Andriamanitra amin'ny alalan'ny herin'i Kristy, Izay Andriamanitra tonga nofo. — UL, t. 141.