"(...) Ary teny an-daniny roa amin'ny ony nisy hazon'aina mamoa voa roa ambin'ny folo samy hafa sady mamoa isam-bolana; ary ny ravin'ny hazo dia ho fanasitranana ny firenena maro." - Apôk. 22:2.
Mofon’aina:
Tsy maintsy miandry ho tafafindra any an-danitra ve isika vao hihinana ny ravin'ny hazon'aina? Izay mandray ny tenin'i Kristy ao am-pony dia mahalala ny atao hoe mihinana ny ravin'ny hazon' aina. (...)
Ny fahalalana izay avy amin' Andriamanitra no mofon'aina. Io no ravin' ny hazon'aina ho fanasitranana ny firenena maro. Velona ny aim-panahy rehefa inoana sy ampiharina ny tenin'i Kristy. Toy izany no hahatonga antsika ho iray amin'i Kristy. Mihamatanjaka ny fanandramantsika izay marefo teo aloha. Izany no fiainana mandrakizay raha hazonintsika mafy hatramin'ny farany ny finoana nananantsika tany am-boalohany. (...)
Manadio antsika ho afaka amin'ny fahalotoana rehetra ny fahamarinana, ary manomana ny fanahy ho amin'ny fanatrehan'i Kristy. Manjary ao anatintsika i Kristy, Izay fanantenana ny voninahitra. (...) Zava-dehibe tokoa ny hananan'ireo izay manolo-tena hitandrina ny didin'Andriamanitra fahalalana tsara ny Soratra Masina, araka ny fahaizany misaina. Toy izany no hianarantsika ny fandavan-tena sy ny fahatokiana tanteraka amin 'Andriamanitra amin'ny fampiasana ny fananany. Ny hahatakarantsika ny sitrapon' Andriamanitra no nanomezany antsika ny Baiboly. (...)
Tsy manana fialan-tsiny ny ray aman-dreny raha mandà tsy hahazo fahalalana mazava kokoa momba ny sitrapon'Andriamanitra. Izany ihany mantsy no fomba ahafahany mitondra ny zanany ho any an-danitra. Ranadahy sy rahavavy, adidinareo ny mahatakatra ny fitakian'Andriamanitra. (...)
Tsy maintsy ataontsika anton-draharahany manao izay ahatakarana ny sitrapon'Andriamanitra; tsy misy afa-tsy izany no hahaizantsika manabe ny zanatsika araka ny tokony ho izy. Aoka ho araka ny sitrapon'Andriamanitra ny teninao rehetra sy ny fihetsikao, ka tsy hanaraka ny fisainana sy ny fanaon'ireo izay mandà tsy hankatô an'Andriamanitra. (...)
"Tsy misy tsiny ny lalàn’i Jehôvah, mamelombelona ny fanahy" — Sal. 19:7. Tsy misy tsy nomen'Andriamanitra izay rehetra ilain'ny zanany mba hampazava ny sainy. Tsy misy fialan-tsiny ho an'ny mpandika ny lalàna; tsy afaka hilaza izy ireo fa tsy nampahafantarina, na koa hoe tsy nofaritana mazava ny lalana mankany an-danitra. — UL, t. 224.