"Ny Raiko Izay nanome Ahy dia lehibe noho izy rehetra; ary tsy misy mahay mandrombaka amin'ny tànan'ny Ray." - Jao. 10:29.
Mofon’aina:
Mila mitombo bebe kokoa amin'ny finoana isika. Kely oatra ny finoantsika. Ny Tenin' Andriamanitra no manohana antsika. Aoka horaisintsika sy hinoantsika tsotra izao ny teny tsirairay, dia ho azontsika atao, araka ny haben'ny finoantsika, ny mitaky zava-dehibe amin'Andriamanitra (...). Raha mampietry ny fontsika eo anatrehan'Andriamanitra isika, raha katsahintsika ny hitoetra ao amin'i Kristy, dia hanana fanandramana ambony sy masina kokoa isika. (...)
Ny fanatanterahana fotsiny izay andidian'Andriamanitra antsika no atao hoe finoana marina, fa tsy ny fanovaovana ny didy asainy ankatoavina. Vokatry ny finoana ny rariny sy ny fahamarinana ary ny famindrampo. Mila mandeha amin'ny fahazavan'ny lalàn'Andriamanitra isika, dia hiteraka asa tsara ny finoantsika, izay vokatry ny fo nohavaozina isan'andro.
Tsy azontsika atao andriamanitra ny tenantsika. Andriamanitra mihitsy no nanolotra ny Tenany ho faty ho antsika, mba hahafahany manadio antsika ho afaka amin'ny faharatsiana rehetra. Hataon'Andriamanitra tanteraka tokoa isika raha avelantsika hofeheziny ny tenantsika. (...)
Tsy afaka manatanteraka asam-pahamarinana isika raha tsy manana finoana ao anatintsika. Aoka ny herin'Andriamanitra tsitoha hifehy ny fihetsikao rehetra. Ny vokatry ny fahamarinana dia ho fiadanana sy fahatokiana mandrakizay. (...) Raha miray Aminy amim-pinoana velona isika dia manana tombon-tsoa hisitraka ny fanelanelanana ataony, izay mahavonjy tokoa. Koa voahombo miaraka amin'i Kristy isika, maty miaraka Aminy, mitsangana amin'ny maty miaraka Aminy, mba handehanantsika amin'ny fiainam-baovao miaraka Aminy.
Aoka isika ho eo an-tanan'i Kristy fa tsy ny tanantsika (...). Ny tsy fananantsika finoana no mahatonga antsika tsy hahita loatra ny herin'Andriamanitra. Ny asan'ny tenantsika no inoantsika kokoa noho ny herin'Andriamanitra miasa ho antsika. Nataon'Andriamanitra izay rehetra azony natao mba hahatonga antsika hiray fo, hiray saina, hanao soroka miara-milanja. Ny tsy fisian'izany fifankatiavana sy fifampitokisana izany no mandemy ny finoantsika an'Andriamanitra.
Mila mivavaka mihoatra noho ny hatramin'izay isika mba ho vita batisa amin'ny Fanahy Masina, satria raha misy fotoana ilana izany batisa izany, dia ankehitriny. (...) Rehefa mandray ny Fanahy ny lehilahy sy ny vehivavy dia handalo fahateraham-baovao. — UL, t. 346.