"Madera sady malaza ny asany; Ary ny fahamarinany maharitra mandrakizay." - Sal. 111:3
Mofon'aina:
Ny tanamasoandro iray avy amin'ny voninahitr'Andriamanitra, ny famirapiratana tokana avy amin'ny fahadiovan'i Kristy, raha miditra ao amin'ny fanahy, dia hampibaribary ny pentina (...) rehetra ao, ka hampihanjahanja ny tsy fetezana sy ny tsinin'ny toetran'olombelona. Ahoana moa no ahafahan'ny olona iray izay entina eo anoloan'ny fenitra masin'ny lalàn'Andriamanitra hirehareha ho manam-pahamasinana? (...) Miseho mazava tsara eo anatrehany ny tsy fahatokiany amin'ny fanaovany tsinontsinona ny lalàn'Andriamanitra, ka dia tsaroany tohina sy ory ny fanahiny noho ny herin'ny Fanahin'Andriamanitra manindrona azy. Maharikoriko azy ny tenany, rehefa hitany ny fahalehibeazan' i Jesôsy Kristy, ny fiandrianany, ary ny toetrany madio tsy misy pentina.
Rehefa manetsika ny fo amin'ny heriny mahatalanjona izay mitondra fifohazana ny Fanahin' i Kristy, dia manjary misy fahatsapana tsy fahatanterahana ao amin'ny fanahy, izay mitarika ho amin'ny fo torotoro sy ny fanetren-tena (...).
Ny fanahy izay mandray izany fikasihana izany dia tsy hitafy na oviana na oviana ny fanamarinan-tena, na koa hihambo ho manam-pahamasinana; tsy izany, fa ho halany ny fitiavan-tenany sy ny fanaovana ny tenany ho zavatra ka hokatsahiny amin'ny alalan'ny fahamarinan'i Kristy izany fahadiovan'ny fo izay mifandrindra amin'ny lalàn'Andriamanitra sy ny toetran'i Kristy izany. Amin' Izay izy vao haneho taratra ny toetran'i Kristy, Ilay fanantenan'ny voninahitra. (...)
Amin'ny fanetren-tena sy ny molotra mangovitra no hanambarany hoe: "Tia ahy Izy. Nanolotra ny Ainy hamonjy ahy Izy. Tonga nahantra Izy mba hampanan-karena ahy amin'ny fahantrany. Tsy nanosi-bohon-tanana ahy ilay Lehilahy zatra fahoriana fa nandrotsaka ny fitiavany tsy mety ritra sy manavotra mba hampahadio ny foko; ary naveriny ho amin'ny fahatokiana amin'ny didiny rehetra sy ny fankatoavana izany aho. Ny fanafoanany ny Tenany, ny fanetren-tenany, ny fanomboana Azy tamin'ny hazo fijaliana no fahagagana izay mameno ny sary mahatalanjon'ny drafi-pamonjena. (...) Nataony izany rehetra izany mba hahatonga ahy hanana anjara amin'ny fahamarinany, mba hitandremako ny lalàna izay efa nodikaiko. Izany no antony iankohofako Aminy. Hanambara Azy amin'ny mpanota rehetra aho." - RC, t. 63.