"[Matokia an]' Andriamanitra, Izay manome antsika malalaka ny zavatra rehetra mba hifaliantsika." - 1 Tim. 6:17
Mofon’aina:
Mety ho sambatra sy ilain'ny fiarahamonina tokoa isika raha toa ny fitsipiky ny fivavahana Kristianina no mifehy ny tokantranontsika sy ny fifandraisantsika amin'ny hafa. (...) Aoka ho hitan'ireo vahinintsika ny fiezahantsika hanao izay hahasambatra ireo manodidina antsika amin'ny alalan'ny toetra miramirana sy ny firaisam-po ary ny fitiavana.
Aoka tsy hohadinointsika mihitsy fa manana adidy eo anatrehan'Andriamanitra isika eo am-piantohana ny mety sy ny mendrika ary ny mahafaly ny vahinintsika. Tsy tokony hamaivanina velively ny oran'ny fanompoam-pivavahana ao an-tokantrano. (...) Aoka ho hitan'ireo vahiny mamangy ny tokantrano kristianina fa fotoana manokana ary masina indrindra ho an'ny mpianakavy ny fotoam-pivavahana. Hanana hery miasa mangina ny ohatra tahaka izany.
Tokony hokatsahin'ny Kristianina ny hanehoana ny Tompony amin'izay ataony rehetra, mba hahatonga ny fanompoana Azy hanintona. (...)
Foronin'ny saina fotsiny ny sivy ampahafolon'ny fitsapana sy ny zava-tsarotra mampitebiteby ny olona maro; mety ho vokatry ny fahadisoana nataony koa anefa izany. Tokony hatsahany ny firesahana momba ireny zava-tsarotra ireny sy ny fanindrahindrana izany. Azon'ny Kristianina lazaina amin'Andriamanitra ny tebitebiny rehetra sy ny zava-manahiran-tsaina azy. Tsy misy zavatra kely loatra ka tsy ho tsikaritr'ilay Mpamonjy antsika be fangorahana; tsy misy lehibe loatra ka tsy ho hainy ny mitondra izany.
Aoka àry isika hanao izay hilaminan'ny tokantranontsika sy ny fontsika; andeha hampianarina ny zanatsika fa ny fahatahorana an'Andriamanitra no fiandoham-pahendrena (...). Kanefa ambonin'ny zavatra rehetra, andeha isika hampifantoka ny fisainantsika sy ny fihetseham-pontsika amin'ilay Mpamonjy malala izay niari-pahoriana ho an'ny olombelona meloka ka nanokatra ny lanitra ho antsika.
Tsy azo afenina ny fitiavana an'i Jesôsy fa tsy maintsy hiseho sy ho tsapa ho azy. (...) Mahatonga ny saro-kenatra ho sahisahy izany, mahatonga ny kamo hanana vitrika, ary mahahendry ny tsy manam-pahalalana. (...) Mitondra fanantenana ho an'izay kivy izany, ary fifaliana ho an'ny malahelo. Mahatonga izay manana azy hanaiky ny andraikitra sy ny asa apetraka aminy ny fitiavana an'i Kristy, ka amin'ny herin'i Kristy no itondrany ireny. - RC, t. 183.