"Fa ataoko fa ny fahoriana amin'izao andro ankehitriny izao dia tsy tokony hoharina amin'ny voninahitra izay haseho amintsika." - Rôm. 8:18
Mofon’aina:
Misy lesona mahatalanjona ahazoan'ny Kristianina hery sy tanjaka ao amin'ny fanandraman'ny apôstôly Jaona rehefa niharan'ny fanenjehana izy. Tsy sakanan'Andriamanitra tsy hanao tetika maizina ny ratsy fanahy, fa ahodiny kosa ny fikasan-dratsiny ho soa ho an'ireo ianjadian'ny fahoriana sy iharan'ny tolona, mba hitehirizana ny finoany sy ny fahamarinany. Mazàna eo anivon'ny ranonoram-baratry ny fanenjehana no anatontosan'ny mpitory ny filazantsara ny asany, ary ao anatin'ny fanoherana feno habibiana sy fampijaliana no ijoroany ho vavolombelona. Aoka hotsaroany amin'izany andro izany fa ny fanandramana azo tao anatin'ny memy afon'ny fitsapana sy ny fahoriana dia mendrika ny fijaliana niaretana mba hahazoana azy.
Toy i zany no iantsoan'Andriamanitra ny zanany hanakaiky Azy mba hanehoany aminy ny heriny ho solon'ny fahalemeny. Mampianatra azy hiankina Aminy izy, ary manomana azy amin'izany fomba izany, hiatrika ny fotoan-tsarotra, mba hahazoany mandray toerana ilana olona mahatoky sy hanatanteraka ny andraikitra nanomezana talenta manokana azy.
Niharan'ny fanaratsiana mandrakariva sy ny fanenjehana noho ny amin'ny fahamarinana ireo vavolombelona notendren' Andriamanitra. (...) Nohazain'ny fahavalony toy ny bibidia i Davida, ilay mpitondra hafatra nofidin' Andriamanitra. Natsipy tao an-davaky ny liona i Daniela noho ny toetra mahatoky nananany tamin' Andriamanitra. Nofonganana tsy hisy teo amin'i Jôba avokoa ny fananany rehetra tety an-tany, ary tena nijaly mafy indrindra tamin'ny aretina nahazo azy izy, (...) nefa nijoro tsy azo nohozongozonina kosa. (...)
Samy nijoro ho vavolombelon'ny fahatokiana amin'ny teny fikasan' Andriamanitra ireny ohatry ny fijoroan'ny olona ireny (...). Naneho ny herin'ny finoana izay mahajoro eo anatrehan'ny fahefan'izao tontolo izao izy ireo. (...)
(...) Tamin'ny alalan'ny fizahan-toetra sy ny fanenjehana no nanehoana teo amin'ireo voafidin'Andriamanitra ny Voninahiny sy ny Toetrany. Nobeazina sy nofehezina tao amin'ny sekolin'i Kristy ireo mpino Azy, izay halan'izao tontolo izao sy enjehiny. Mandeha amin'ny lalana ety izy ireo eto an-tany; voadio amin'ny lafaoro mirehitry ny fahoriana izy ireo. - RC, t. 357.