« Indro, ny marina aza dia valiana ety an-tany, koa mainka fa ny ratsy fanahy sy ny mpanota! » Ohab. 11:31.
Mofon'aina:
Mandray ny valin’asany eto an-tany ny ratsy fanahy (Ohab. 11:31). Dia “ho vodivary” izy, “ka handoro azy ny andro izay ho avy, hoy Jehôvah, Tompon’ny maro” – Mal. 3:19. (...) Samy hofaizina “araka ny asany” avy izy. Efa nafindra tamin’i Satana ny fahotan’ny tsara fanahy ka tsy hijaly noho ny fikomiana nataon’ny tenany fotsiny izy, fa noho ny fahotana rehetra nampanaoviny ny vahoakan’Andriamanitra koa. Ny famaizana hihatra aminy dia ho mafy lavitra noho ny an’ny olona nofitahiny. (...) Amin’ny farany dia ho levon’ny afo mpanadio ny ratsy fanahy, “na ny fakany na ny sampany”. Satana no fakany, ary ireo mpanaraka azy no sampany.
Hofongorana i Satana sy izay rehetra nanaraka azy teo amin’ny fikomiana. (...) “Fa rehefa afaka kelikely, dia tsy hisy ny ratsy fanahy; handinika ny fonenany ianao, fa tsy ho hita izy”. “Ary ho toy ny tsy ary izy.” – Sal. 37:10.
Tanteraka ny fahamarinan’Andriamanitra, ary ny olona masina sy ny andian’anjely rehetra dia nanao tamin’ny feo mahery hoe: “Amena”. Mandritra ny fotoana hamonosan’ny afon’ny valifatin’Andriamanitra ny tany, dia mitoetra voaro ao anatin’ny tanàna masina ny olona marina. Tsy nanan-kery tamin’ireo nandray anjara tamin’ny fitsanganana voalohany ny fahafatesana faharoa (Apôk. 20:6). Afo mandevona Andriamanitra ho an’ireo ratsy fanahy, saingy masoandro sy fialofana kosa Izy ho an’ny olony (Sal. 84:11).
Manadio ny tany ny afo izay mandevona ny ratsy fanahy. Voafafa ny ozona rehetra. Tsy hisy helo mirehitra afo mandrakizay eo anatrehan’ny voavonjy hampahatsiaro mandrakariva ny vokatra mahatsiravina avy amin’ny fahotana.
Fampahatsiahivana tokana ihany no hitoetra: hitondra mandrakariva ny holatry ny nanomboana Azy tamin’ny hazo fijaliana Ilay Mpanavotra antsika. (…)
Tafaverina avokoa izay rehetra very noho ny fahotana. (...) Tanteraka ny fikasan’Andriamanitra tany am-boalohany tamin’ny namoronany ny tany dia ny hanao azy ho fonenan’ny voavotra mandrakizay. “Ny marina handova ny tany, ka honina eo aminy mandrakizay.” – Sal. 37:29. – Ma, t. 348.