"Anaka, izany zavatra izany no soratako aminareo mba tsy hanotanareo. Ary raha misy manota, dia manana Solovava ao amin'ny Ray isika, dia Jesôsy Kristy, Ilay Marina." - 1 Jao. 2:1.
Mofon’aina:
Manana Solovava isika eo amin'ny seza fiandrianan' Andriamanitra, izay voahodidin'ny avan'ny fanekena, ary asaina isika hitondra ny fangatahantsika eo anatrehan'ny Ray amin'ny anaran'i Kristy. Hoy i Jesôsy: Angataho amin'ny anarako izay tianareo na inona na inona, fa ho tonga aminareo izany. Ny fivavahanareo amin'ny anarako dia manambara fa tena ahy ianareo, zanako lahy sy zanako vavy, ary ny Ray hitondra anareo tahaka ny zanany sy ho tia anareo toy ny itiavany Ahy. Hahatonga anao hanam-pitiavana lalina Ahy sy ny Ray, toy ny fifankatiavan'ny ray sy ny zanaka, ny finoanao Ahy. Izaho no rojo volamena mampifandray ny fonao sy ny fanahinao amin'ny fitiavana sy fankatoavana ny Ray. Asehoy amin'ny Ray fa sarobidy aminao ny anarako, fa manaja sy tia ahy ianao, dia azonao angatahina izay tianao. Hamela ny helokao Izy ary handray anao ho isan'ny ankohonany — hataony zanak'Andriamanitra ianao, mpiara-mandova amin'ny Zanany Lahitokana.
Hohamasininy ianao amin'ny alalan'ny finoanao ny anarako. Izany fahamasinana izany no hahatonga anao ho afaka hanao ny asany ao anatin'ny tontolo feno fahotana, sy hahazo ilay lova mandrakizay ao amin'ny fanjakany. Tsy ny lanitra ihany no nosokafan'Andriamanitra fa ny fony manontolo ho an'izay mino ny sorona nataon'i Kristy sy izay mibebaka amin'ny finoana ny fitiavan' Andriamanitra. Mahazo mitaky ny haren-tsarobidin'ny lanitra, noho ny harem-pahasoavan'Andriamanitra, ireo izay mino an'i Kristy ho Mpitondra ny fahotany, ho Avotra noho ny fahotany, ho Mpanelanelana ho azy. (...)
Manokatra trano firaketana harena ny vavaky ny torotoro fo, ary mihazona hery tsitoha. Mahatongailaympangataka hahatakatra ny atao hoe mamikitra amin'ny herin'Andriamanitra sy mihavana Aminy ny vavaka toy izany. Mahatonga antsika hanana hery miasa mangina amin'ireo izay mifanerasera amintsika ny vavaka toy izany. (...) Tombontsoa sy adidintsika ny mitondra ny herin'ny anaran'i Kristy ao amin'ny fangatahantsika, sy ny mampiasa ireo tohan-kevitra nampiasain'i Kristy ho antsika. Dia hifandrindra tanteraka amin'ny sitrapon'Andriamanitra ny vavaka ataontsika. — ST, 18 Jona 1896.