"Fa miambena ka mivavaha mandrakariva, mba hahery hianareo ka handositra izany zavatra ho avy rehetra izany ary hitsangana eo anatrehan'ny Zanak'olona." - Lio. 21:36.
Mofon’aina:
Mivavaha hatrany amin'ny Rainao any an-danitra. Arakaraka ny ivavahanao matetika no hahatonga ny fanahinao ho voasintona hanakaiky an'Andriamanitra masina. Hifona ho an'ny mpangataka tso-po ny Fanahy Masina, amin'ny fitarainana tsy azo tononina, ary halefaka sy hilefitra eo anatrehan'ny fitiavan'Andriamanitra ny fo. Hisava ny rahona sy ny aloka anaronan'i Satana ny fanahy, amin'ny alalan'ny taratra mazavan'ny Masoandron'ny fahamarinana, ka hohazavain'ny Fahazavana avy any an-danitra ireo efitrefitra ao amin'ny saina sy ny fo.
Kanefa aza kivy raha toa tsy mivaly eo no ho eo ny vavakao. Hitan'ny Tompo fa matetika mifangaro amin'ny fisainana ara-nofo eto an-tany ny vavaka. Ny hanomezana fahafaham-po ny faniriany feno fitiavan-tena no ivavahan'ny olona, koa tsy valian'Andriamanitra amin'ny fomba antenain'izy ireo ny vavaka ataony. Ampandaloviny fisedrana sy fitsapana izy ireo, ataony mietry, mandra-pahitan'izy ireo mazava ny tena ilainy. Tsy omen'ny Tompo ny zanany izay zavatra manome fahafaham-po ny filana ambany, na izay manimba ny olombelona, na izay manala baraka azy eo imason'Andriamanitra. Raha fanirian-daza na ho fanandratan-tena fotsiny ny tanjon'izy ireo, dia tsy homeny azy izay angatahiny. Tsy maintsy amin'ny fo mietry sy torotoro, milefitra tanteraka amin'ny sitrapony masina, no anatonantsika an'Andriamanitra.
Nanao izao vavaka izao i Kristy tao amin'ny saha Getsemane: "Raiko ô, raha sitrakao, dia esory amiko ity kapoaka ity." Ny kapoaka nentiny amim-bavaka mba hesorina Aminy, izay toa mangidy loatra ho an'ny fanahiny, dia ny kapoaky ny fisarahana amin'Andriamanitra noho ny fahotan'izao tontolo izao. Tonga toy ny meloka teo anatrehan'Andriamanitra Izy, Izay tanteraka sy tsy manan-tsiny, mba ho voavela heloka ny meloka ka hijoro tsy hanan-tsiny eo anatrehan'Andriamanitra. Rehefa azony antoka fa tsy misy fomba hafa azo amonjena izao tontolo izao afa-tsy ny fanaovana sorona ny Tenany, dia hoy Izy: "nefa aoka tsy ny sitrapoko anie no hatao, fa ny Anao." Ny toe-tsaina milefitra nasehon'i Kristy teo am-panandratana vavaka amin'Andriamanitra no toe-tsaina ankasitrahan'Andriamanitra. — RH, 19 Nôvambra 1895.