"Mba homen'Andriamanitr’i Jesôsy Kristy Tompontsika, Rain'ny voninahitra, ho anareo ny fanahin 'ny fahendrena sy ny fanambarana amin’ny fahalalana Azy tsara, ary mba hampahiratina ny mason'ny sainareo (...)" Efes. 1:17,18.
Mofon’aina:
Ny fomba tsara indrindra hanakanana ny faharatsiana tsy hitombo dia ny fanomanana mialoha ny tany. Ilaina ny fikarakarana sy ny fitandremana fatratra mba hikolokoloana ny saina sy hambolena ny voan'ny fahamarinana sarobidin'ny Baiboly ao. Nambaran'ny Tompo tamintsika, noho ny famindrampony lehibe, ireo fitsipiky ny fahamasinam-piainana. Lazainy amintsika ireo fahotana tokony hialana; manazava ny drafi-pamonjena Izy ary manoro antsika ny làlana mankany an-danitra. Nanindry mandry olona masina Izy mba hanoratra torolalana momba ireo loza mananontanona ny làlantsika sy ny fomba hialana amin'izany, ho tombontsoantsika. Ireo izay mankatò ny baikony handinika ny Soratra Masina dia tsy ho diso anjara amin'ny fahalalana ireo zavatra ireo. Tokony hahatakatra ny anton'ny fanantenany sy ny finoany ireo mambran'ny fiangonana ao anatin'ny fotoan-tsarotra amin'ny andro farany, izay antony tsy saro-takarina. Manana ny ampy hamenoana ny saina isika, raha tiantsika ny hitombo amin'ny fahasoavana sy ny fahalalana ny Tompontsika Jesôsy Kristy.
Raha ianarana araka ny tokony ho izy ny Baiboly dia hahatonga antsika harani-tsaina tokoa. Mampitombo ny fahaizantsika misaina ireo lohahevitra resahina ao amin'ny Tenin'Andriamanitra sy ny fahatsorany mbamin'ny fahamendrehan'ny fanehoan-keviny, ary tsy misy fomba hafa mahavita izany (...).
Tian'Andriamanitra hanao ny fomba rehetra isika hikolokoloana sy hanatanjahana ny herintsika ara-tsaina. Nohariana ho amin'ny fiainana ambony sy mendrika kokoa noho izao fiainantsika ankehitriny izao isika. Izao no fotoana fiomanana ho amin'ny fiainan-ko avy, dia ny fiainana mandrakizay. Aiza no misy lohahevitra lehibe sy mahaliana kokoa hodinihina sy hosaintsainina, noho ireo fahamarinana miezinezina aseho ao amin'ny Baiboly? Hanatanteraka asa mahery vaika ho antsika ireo fahamarinana ireo, raha manaraka tsara izay ampianariny isika.
Mijoro eo anilan'ireo mikatsaka ny fahamarinana amin'ny fo ny anjely avy any amin'ny tontolon'ny fahazavana, mba handresy lahatra sy hanazava ny saina. Afaka mahita fahazavana amin'ny alalan'ny fandinihana matetika ny Soratra Masina izay rehetra ao anaty haizin'ny tsy fahatakarana. - CTBH, tt. 125,126.