"Raha mitady azy toy ny fitady volafotsy hianao, ary mikatsaka azy toy ny fikatsaka harena afenina, dia ho fantatrao marina ny fahatahorana an'i Jehôvah , ary ho hitanao ny fahalalana an 'Andriamanitra." - Ohab. 2:4,5.
Mofon’aina:
Ahoka tsy hisy hihevitra fa tsy misy intsony fahalalana horantovina. Azo refesina ny halalin'ny sain'olombelona; azo atao ny mahalala tanteraka ny asan'ny mpanoratra malaza, fa tsy hahatakatra ny sain'Andriamanitra kosa ny manan-tsaina indrindra. Misy tsy hita fetra any ankoatr 'izay rehetra azontsika fantarina. Mangirana kely fotsiny no hitantsika ny amin'ny voninahitr'Andriamanitra sy ny fahalalany tsy hita fetra ary ny fahendreny (...). Tsy maintsy halentika lalina hatrany ny lelan'angady, mba hahitana ny harena be voninahitra. Amin'ny alalan'ny finoana marina dia hanjary fahalalan'Andriamanitra ny fahalalan'olombelona.
Tsy misy olona mikaroka ny Soratra Masina amin'ny fanahin'i Kristy ka tsy hahazo valisoa. Rehefa maniry ny hampianarina toy ny zazakely ny olona, rehefa milefitra tanteraka amin'Andriamanitra izy, dia hahita ny fahamarinana ao amin'ny teniny. Raha mba mety mankatò ny olona, dia ho takany ny drafitry ny fanjakan'Andriamanitra, hisokatra hozahany ireo efitrefitra feno fahasoavana sy voninahitra any amin'ny tontolo any an-danitra. Ho tonga hafa dia hafa noho izao toetrany ankehitriny izao ny olombelona satria hanandratra azy ny fikatsahana ny fahamarinana. Ny zava-miafin'ny fanavotana sy i Kristy tonga nofo ary ny fanati-panorenana nataony dia tsy hanjavozavo tahaka ny ankehitriny intsony. Tsy hoe hihazava fotsiny izy ireny, fa hankasitrahana fatratra koa. (...)
Ambony noho ny volamena sy ny volafotsy ny tombambidin'io harena io. Tsy azo ampitahaina aminy ny haren'ny vatosoan'ny tany. "Hoy ny lalina: tsy ato anatiko izy; ary, tsy ato amiko izy, hoy ny ranomasina. Ny volamena tsara tsy mahatakalo azy, ary ny volafotsy tsy azo lanjaina ho vidiny; ny volamena avy any Ofira tsy ampy ho tombany, na ny beryla saro-bidy sy ny safira aza. Ny volamena sy ny fitaratra tsy azo ampitahaina aminy. Ary tsy azo takalozana firavaka tena volamena izy. Tsy tokony hotsaroana akory ny voahangy sy ny vato krystaly, fa ny fahazoana fahendrena dia mihoatra noho ny voahangy". - Jôba 28:14-18. — ST, 12 Septambra 1996.