"Mba tsy ho zaza intsony isika, ka ahilangilana sy ampitambolimbolenin 'ny rivotry ny fampianarana samy hafa rehetra (..) fa mba hanaraka ny marina amin'ny fitiavana ka hitombo amin'ny zavatra rehetra ho amin’Izay Loha, dia Kristy." - Efes. 4:14,15.
Mofon’aina:
Takin'Andriamanitra amin'ny olony rehetra ny hanatsara ny fahaiza-manao nomeny azy ireo. Tokony hampitomboina araka izay azo atao ny tanjaka sy ny fahamendrehan'ny saina, amin'ny alalan'ny fisaintsainana ireo fahamarinana ara-panahy. Raha avela ho feno zavatra tsy misy dikany sy ho feno fiahiahiana izao fiainana izao ny saina dia hanjary osa sy tia zava-poana ary tsy ampy herim-panahy, araka ny lalàm-piainana tsy azo ovana.
Eo anoloantsika ny andro hizahan-toetra ny fanahintsika, ary tsy hahajoro amin'ireo andro mahory ireo izay malemy finoana. Tokony hodinihintsika amim-pitandremana ireo fahamarinan-dehibe ao amin'ny Baiboly; hilaintsika any aoriana mantsy ny fahalalana tsara ny Tenin'Andriamanitra. Ho hitantsika mazava ny andraikitsika tsirairay amin'ny alalan'ny fandinihana ny Baiboly, ary hahazo hery isika hiatrehana ny andron'ny fakam-panahy sy ny fizahan-toetra. Hotehirizin'ny herin' Andriamanitra ho amin'ny famonjena, amin'ny alalan'ny finoana, izay olona manana fiainana mifamatotra amin'i Kristy.
Aoka isika hifantoka kokoa amin'ny zava-panahy, ary hampihena ny fahalianantsika amin'ny zavatry ny tany. Raha mandeha araka izany ireo mpampianatra tia izao tontolo izao, dia mety hanjary hifankazatra amin'ny Tenin'Andriamanitra tahaka ny ifankazaran'izy ireo ankehitriny raharahan'izao tontolo izao. "Diniho ny Soratra Masina" hoy i Kristy, "satria ataonareo fa ao aminy no anananareo fiainana mandrakizay, ary ireny no manambara Ahy." Jao. 5:39.
Takina amin'ny Kristianina ny hazoto handinika ny Soratra Masina, sy hamaky imbetsaka ny fahamarinana ao amin'ny Tenin'Andriamanitra. Mampidi-doza ny ain'ny Kristianina sy ny toetrany ny finiavany tsy te hahalala ny amin'izany. Manajamba ny saina sy manimba ny hery mendrika indrindra izany. Io no mampisavorovoro ny fiainantsika. Mila mahatakatra ny tenin'Andriamanitra isika vahoakany; mil a manana fahalalana an-tsipiriany momba ireo foto-kevitry ny fahamarinana nambara, izay hanomana antsika ho amin'izay hitranga eto an-tany, sy hiaro antsika tsy hampitambolimbolenin'ny rivotry ny fampianarana samy hafa rehetra. — TFC, b.'5, tt. 272,273.