"Tsy fantatrareo va fa tempolin' Andriamanitra hianareo, ary ny Fanahin 'Andriamanitra mitoetra ao anatinareo?" - 1 Kôr. 3:16.
Nomen'Andriamanitra trano fonenana ianao hokarakaraina sy harovana amin'ny ratsy mba hahavitany tsara ny asany ho voninahitry ny Tompo. Tsy ianao no tompon'ny tenanao (...). "Tsy fantatrareo va fa tempolin' Andriamanitra hianareo, ary ny Fanahin' Andriamanitra mitoetra ao anatinareo?"
Fitahiana ny fahasalamana, ary vitsy ihany no tena mahafantatra ny tombany (...). Zava-masina nankinina tamintsika ny fiainana, ary Andriamanitra irery ihany no ahafahantsika miaro sy mampiasa izany ho voninahiny. Hikarakara manokana sy hitahiry ny vatana ho salama tsara Ilay namorona sy nanamboatra ny firafiny raha toa ka tsy miasa manohitra izany ny olombelona. Hanampy antsika Izy amin'ny fampitomboana sy ny fampiasana ny talenta rehetra nomeny antsika, mifanaraka amin'ny sitrapon'Ilay Mpanome.
Fotoana fikolokoloana fahazarana tsara ny fahatanorana, fanitsiana ireo fahazaran-dratsy ananana, fianarana mifehy tena, fanaovana drafitra, ary fambolena fahazarana mandamina sy mandrindra ny asa rehetra eo amin'ny fiainana araka ny sitrapon' Andriamanitra.
Ny vatana, tempoly masina, dia tsy maintsy tehirizina ho madio sy tsy voaloto, mba hahafahan'ny FanahyvMasina mitoetra ao anatiny. Mila miambina ny fananan'ny Tompo amim- pahatokiana isika satria izay rehetra mety manimba ny herintsika dia manafohy ny andro tokony hampiasaintsika ho voninahitr' Andriamanitra. Aoka ho ao an-tsaintsika mandrakariva fa tsy maintsy atokantsika ho an' Andriamanitra ny zavatra rehetra ny fanahy, ny vatana, ary ny saina. Fananana novidiny avokoa ireo rehetra ireo ary tsy maintsy ampiasaina amim-pandanjalanjana tsara, mba hahazoantsika mitahiry ny fiainana, izay talenta nomena antsika.
Ny fampiasantsika ny herintsika rehetra araka ny tokony ho izy amin'ny zavatra mahasoa indrindra, amin'ny fitehirizantsika ny taova rehetra ho salama tsara, amin'ny fiarovana izany taova izany mba hahazoan'ny saina sy ny fitatitra ary ny ozatra miara-miasa amim-pirindrana, no ahafahantsika manatanteraka ny fanompoana tsara indrindra ho an' Andriamanitra.
Rehefa manao izay rehetra azontsika atao isika mba ho salama, dia mahazo manantena fitahiana ho vokatr'izany, ary azontsika atao ny mangataka amim- pinoana amin' Andriamanitra mba hitahy ny ezaka ataontsika eo amim- pitandroantsika ny fahasalamantsika. MLT, t. 134.