"Ny fatin-dalitra mahamaimbo sy mampamorivory ny menaky ny mpangaroharo zava manitra; ary toy izany, ny fahadalana kely dia mavesatra noho ny fahendrena sy ny voninahitra." - Mpitt. 10:1.
Mofon’aina:
Miantso ireo anadahy sy rahavavy ao amin'ny finoana aho ary mananatra azy ireo mba hikolokolo ny fahalemem-panahy. Na inona na inona toerana niantsoana anao, dia tsy hahafaly ny Tompo ianao raha toa mankamamy ny fitiavan-tena sy ny fieremana. Aoka tsy ataonao ho fialan-tsiny amin'ny fitiavan-tena sy ny tsy fanaovana ny rariny manoloana ny hafa ny raharahan'Andtiamanitra (...). Tsy hankasitrahan'Andriamanitra mihitsy ny hitondrana tombom-barotra azo avy tamin'ny fifampiraharahana feno fitiavan-tena ho ao amin'ny trano firaketany.
Tokony hilefitra eo ambany fanaraha-mason'ny lanitra ny asa atao rehetra mifandraika amin'ny Asany. Ny fifanaraham-barotra rehetra misy hafetsifetsena, ny fanararaotana ireo olona tsy afa-manoatra noho ny zava-misy, ny tetika rehetra hividianana ny taniny na ny fananany amin'ny vidiny ambanin'izay tokony ho izy, dia tsy ankasitrahan' Andriamanitra, na dia hatolotra ho fanatitra hanohanana ny Asany aza ny tombony avy amin'izany. Naloa ho an 'ny olombelona rehetra ny sandan'ny ran' ilay Zanaka Lahitokan' Andriamanitra, ka zava-dehibe indrindra ny fahatokiana eo amin'ny fifampiraharahana ara-barotra sy ny fitondrana ny olon-drehetra ara-drariny, mba hanatanterahana ireo fitsipiky ny lalàn'Andriamanitra. (... )
Raha misy anadahy na rahavavy niasa mafy tamin'ny fo sy tsy tamim-pitiavan-tena ho an'ny raharahan'Andriamanitra nefa tonga malemy sy tsy afa-miasa, aoka izy tsy horoahina na koa avela hitady fivelomana araka izay azony atao. Omeo karama sahaza mba hahazoany mivelona izy, satria aza hadinoina fa anisan'ny ankohonan'Andriamanitra izy ary mpiray tampo avokoa ianareo. (...)
Omena baiko mba ho tia ny namana tahaka ny tena isika. Tsy ny fitiavana ireo izay manana fisainana tahaka ny antsika sy mino izay inoantsika ihany no fonosin'izany baiko izany. Tao amin'ny fanoharana momba ilay Samaritana tsara fanahy no nanehoan'i Kristy ny hevitr'io didy io. Manao ahoana anefa no anaovantsika tsirambina ireny teny sarobidy ireny, ary matetika manao ahoana no ampahorian'ny olona ny namany sy anandratany ny fanahiny ho amin'ny zava-poana. - RH, 18 Desambra 1894.