"Inona moa ny olona, no ahatsiarovanao azy? Ary ny zanak'olombelona, no amangianao azy? Fa efa nataonao ambany kely noho Andriamanitra izy, ary efa nosatrohanao voninahitra sy fiandrianana." — Sa1. 8:4,5.
Mofon’aina:
Asain'ilay Ray be fitiavana (...) mitoky Aminy tahaka ny fitokian'ny zanaka amin'ny ray aman-dreniny eto an-tany isika. Matetika anefa isika no mahita olombelona mahantra sy malemy mivesatra ny fiahiana sy ny fahasahiranana izay tsy nataon'Andriamanitra hoentiny akory. Nampifamadihan' izy ireo ny filaharan-javatra; mikatsaka izao tontolo izao aloha izy ka ny fanjakan'ny lanitra no ataony ambin-javatra. Raha toa ny tsintsina izay tsy mihevitra izay ilainy amin'ny hoavy aza voakarakara, nahoana ny fotoana sy ny fifantohan'ny olombelona izay noforonina araka ny endrik'Andriamanitra no mifantoka tanteraka amin'ireny zavatra ireny?
Nomen'Andriamanitra antsika ny porofo rehetra ny amin'ny fitiavany sy ny fiahiany; impiry anefa isika no tsy mahita ny tanany eo amin'ireo fitahiana tsy tambo isaina. Ny fahaiza-manao ananan'ny olombelona rehetra, ny fofon'aina ao anatintsika, ny fiadanana ankafizintsika rehetra, dia avy Aminy avokoa. Isaky ny mivory eo amin'ny latabatra ny ankohonana mba handray ny anjara famelombelomana ho azy, dia tokony hotsaroantsika fa fanehoana ny fitiavan'Andriamanitra izany rehetra izany. Moa ve horaisintsika ny fanomezana nefa holavintsika ny Mpanome? (...)
Rehefa napetraka tao amin'ny fonenany tao Edena i Adama sy i Eva, dia nanana ny zavatra rehetra izay nomen' ilay Mpamorona feno fiahiana mba hiadanany sy hahasambatra azy. Mbola tsy nankatô an'Andriamanitra ihany anefa izy ireo ka noroahina tsy ho ao amin'ilay fonenana maha-te ho tia intsony. Naseho antsika tao amin'ny fanomezana iray ny fitiavan'Andriamanitra lehibe avy eo, dia ny Zanany malalany. Raha tsy nandray ilay fanomezana ireo razambentsika, dia ho ao anatin'ny fahoriana tsy misy fanafany ny olombelona amin'izao fotoana izao. (...)
(...) Na dia teo aza ny ozona natao tamin'ny tany, dia ny hitondrany tsilo sy hery, dia mbola misy voninkazo eo ambonin'ny tsilo. Tsy hoe fahoriana sy fijaliana avokoa no eto amin'izao tontolo izao. Mivelatra eo anoloantsika hianarantsika ny boky lehiben'ny natiora, ary avy aminy no hahazoantsika hevitra ambony mikasika ny fahalehibiazana sy ny voninahitr'Andriamanitra. — RH, 27 Oktôbra 1885.