"Mampandeha loharano eny amin'ny lohasaha Izy; eny anelanelan'ny tendrombohitra no alehan'ireny, ka isotroan'ny bibi-dia rehetra, sy analan'ny boriki-dia ny hetahetany." — Sal. 104:10,11.
Mofon’aina:
Ny zavaboary sy ny fanambarana avy any ambony, dia samy mampiseho ny fitiavan'Andriamanitra ny olona. Ny Raintsika any an-danitra no loharanon'ny fiainana sy ny fahendrena ary ny fifaliana. Jereo ange ireo zava-mahagaga sy tsara tarehy amin'ny zavaboary e! Eritrereto ange izao fanamboarana azy mahatalanjona, ka tonga amin' izay ilana azy indrindra sy izay hampiadana, tsy ny olona ihany, fa ny zava-manana aina rehetra koa. Ny hainandro sy ny ranonorana, izay maharavoravo sy manavao ny tany; ny tendrombohitra sy ny ranomasina ary ny tany lemaka; ireny rehetra ireny dia samy milaza amintsika ny fitiavan'ny Mpamorona. (...)
(...) Efa nataon'Andriamanitra masina sy tanteraka ny olona tamin'ny voalohany. Ary fony vao nivoaka teo am-pelatanan'Ilay Nahary ny tanintsika, dia tsara tsy nisy kilema, ka tsy nahitana na dia aloky ny fanozonana kely akory aza. Fa ny fandikana ny lalàn'Andriamanitra -dia ny lalàn'ny fitiavana - no nitondra loza sy fahafatesana.
Kanefa na dia ao amin'ny fijaliana vokatry ny fahotana aza, dia mbola miseho ihany ny fitiavan'Andriamanitra. Voasoratra fa nozonin'Andriamanitra ny tany noho ny nataon'ny olona. Ny tsilo sy hery, izany hoe fahasahiranana sy fahoriana izay mahatonga ny fiainantsika ho feno fanahiana sy asa mahareraka, dia voatendry hahasoa antsika, ho isan'ny fanamboarana ilaina amin'ny fikasan'Andriamanitra hampisondrotra antsika avy amin'ny faharavana (...) vokatry ny fahotana.
Izao tontolo izao, na dia efa simba aza, dia tsy alahelo sy fahoriana avokoa tsy akory (...). Misy fampanantenana sy fampiononana eo amin'ny tenan'ny zavaboary. Fa misy voninkazo eny amin'ny hery, ary ny tsilo dia rakotry ny vonin-draozy.
"Andriamanitra fitiavana" no voasoratra eny amin'ny tsiry vao mivelatra sy eny amin'ny ahitra vao mitsimoka. Ny vorona maha-te ho tia izay mampiravoravo ny habakabaka amin'ny hirany mahafinaritra, ny voninkazo misoratsoratra izay mandefa ny fofony manitra mamerovero eny amin'ny rivotra, ny hazo mijoalajoala ao an'ala izay miravaka ny raviny maitso mavana —Ireny rehetra ireny dia mitory ny fitiavana fatratra sy ny fitandremana ambony indrindra ataon'Andriamanitra ary ny faniriany hahasambatra ny zanany. — DHK, tt. 6-8.