"Jesosy namaly ka nanao taminy hoe: Lazaiko aminao marina dia marina tokoa: Raha tsy ateraka indray ny olona, dia tsy mahazo mahita ny fanjakan'Andriamanitra." Jao. 3:3.
Mofon’aina:
Tokony ho mpiara-miasa amin' Andriamanitra, miaraka amin'i Kristy, ny mpampianatry ny Sekoly Sabata. Aza mianina amin'ny fivavahana fombafomba fotsiny sy tsy misy aina. Ny fanangonana fanahy ho an'ny Tompo no tokony ho tanjon'ny Sekoly Sabata. Mety hirindra tsara ny fandaharana, mipetrapetraka araka izay irina ny fitaovana rehetra; saingy raha tsy voataona ho eo amin'i Kristy ny ankizy sy ny tanora, dia tsy mahomby izany ilay sekoly. Raha tsy voasarika ho eo amin'i Kristy mantsy ireo fanahy ireo, dia hanjary feno tsy firaihana, ary tsy hisy fiantraikany aminy ny fombafombam-pivavahana. (...)
Raha mamaly ny antson'ny Fanahy Masina ny mpianatra ka manokatra ny fony hidiran'i Jesosy, dia hosokafana ny sain' izy ireo hahatakatra ireo zava-panahy. Asa tsotra ny asan'ny mpampianatra, kanefa raha tanterahina amin'ny toe-tsain'i Jesosy sy ny fanampian'ny Fanahy Masina izany, dia ho lalina sy hahomby kokoa.
Tokony hiasa bebe kokoa ny isam-batan'olona ao amin'ny Sekoly Sabata. Tsy fantatra na ankasitrahana araka ny tokony ho izy ny filana izany fomba fiasa izany. Amin'ny fo feno fankasitrahana ny fitiavan'Andriamanitra, izay nomeny ho an'ny fanahy, no tokony hiasan'ny mpampianatra amim-pahalemem-panahy sy amim-pahamatorana ho amin'ny fiovam-pon'ny mpianatra.
Inona no porofo azontsika homena izao tontolo izao fa tsy fombafomba fotsiny ny asan'ny Sekoly Sabata? Ny voany no hitsarana azy. Hotombanana araka ny toetra sy ny asan'ny mpianany izany. Tokony hanankinana andraikitra ireo tanora kristianina ao anatin'ny Sekoly Sabatantsika, mba hahafahan'izy ireo mampivelatra ny fahaizany sy mahazo hery ara-panahy.
Aoka hanolo-tena ho an'Andriamanitra aloha ny tanora, ary avy eo, hampianarina hanampy ny hafa dieny izao mbola kely izao. Hahafahany mampiasa ny fahaizany izany, ary manampy azy hahay hanao drafitra sy hanatanteraka ny drafiny mba hahasoa ny namany. Aoka izy ireo ho naman'ireo mua fanampiana, tsy hanao resadresa-poana anefa, fa mba haneho toetra kristianina, ho mpiara-miasa amin'Andriamanitra, amin'ny famaboana ireo izay tsy mbola nanolo-tena ho an'Andriamanitra. — Testimonies on Sabbath School Work, tt. 47,48.